Къаякентла районнизиб ятимти ва мискинни хIер­бирути хъалибар­гу­назибадти 40 дурхIялис школала гIягI­ниахълуми дедиб. Ил балбуцлизир бутIакьяндеш дариб багьудила ва гIилмула министрла къуллукъуни заманалис дузахъуси ЯхIъя Бучаевли, МяхIячкъалала «Россияла нешани» ВОД-ла председатель Сефижат МяхIяммадрасуловани.

«ДурхIни школализи хIядурбара» балбуцла дазурбазир дурхIнас портфельти, белкI-белчIла гIягIниахълуми ва палтарла сертификатуни дедиб. Иличил барх районна администрацияли дурхIнас бизити хурегунира гьаладихьиб ва конкурсуни дурадеркIиб.
«ДурхIни школализи хIядурбара» би­­кIуси балбуц «Россияла нешани» жа­мигIятла хIяракатла сипталичил республикала багьудила ва гIилмула Министерствола кумекличил дураберкIибси саби. Илала бекIлибиубси мурад – яшавла даража камти хъалибаргуначи жамигIятла пикри бяхIчиаъни, къиянти гIямрула шуртIразиб хIербирути бучIантас кумек гIеббаахъес багьандан.
БегI гьалаб кумекбарибтазивадси сайри Первомайскла С.БяхIяммаевла уличилси гимназияла 4-ибил классла учIан. Илала бегIти агара ва ил мижитлизив хIерирули сай. Къаякентла районна бекI МяхIяммад Эльдерхановли, ЯхIъя Бучаевли ва Сефижат МяхIяммадрасуловани илала гIямрула шуртIри ахтардидариб ва савгъатуни дедиб.
«Нура школала гIямруличивхIели бегIти агарли калунсира, амма ил уркIиагарвиэс сабаб ахIен», — викIи районна бекI, — баркалла Министерстволис, «Россияла нешани» организациялис ва районна депутатунас дурхIнас ишгъуна байрам пешкешбарнилис. Нушани кьасбирехIе бучIантас сабухъчебси белчIудилис шуртIри акIахъес. ДурхIни, хIушачи биалли, ункъли дучIес ва лайикьти адамтили детаэс хъарси саби».