Бамсриихъути бучIантачил гьуниваиб

«Цаси Россия» партияла Да­гъистанна регионна от­де­лениела секретарь, ДР-ла БекI Сергей Меликов Республикала биш­тIа­тала арадеш мяхIкамбирнила-багьудила «Солнечный берег» центрлизи гьаввакIиб. Ре­гионна БекI бамсриихъути бучIантачил гьу­ниваиб ва лагерьлизирти шуртIрачила хьар­хъардяхъиб.
«Нуша иша дакIибтира, хIушани сегъунти шуртIразиб бамсриихъулрал хIерэс ва илди секьяйда ункъдарес вирарал пик­рибарес багьандан. Нушала Каспи урхьула ванаси дубличиб бамсриихъахъес гIурра бахъал дурхIни башахъес дигулра», — дурхIначи дугьаизур Сергей Меликов. Илини дурхIнала лагерьлизирти шуртIри гьатIира ункъдарили дирар или буриб.

Гьунибаънила бутIакьянчибани дурхI­на­ла лагерьтази путевкабала лугIи камкабарни­ли­чила масъала хIербариб. Регионна партияла отделениела секретарьла заместитель Елена Ельниковани баянбарни хIясибли, илди камдарибти сари республикализиб корона­вирусла чейхъуси изала тIинтIбикIнила урехи лебни ва иличибли регионнизир мяхI­кам­дешла далдуцуни дурадуркIни багьандан.
С.Меликовличилси ихтилатлизиб дурхI­­нани чус спортли биркьес мер камли биъ­­ниличилара гьанбушиб: «Дагъистаннис спортла сагати площадкаби дахъал гIягIнидиркур, халати шагьуртазирцунра ахIи, районтазирра. Нушани бетарусигъуна бирулра, илди тIашдатахъес багьандан. Илала дурабад, ил масъалализиб республикалис Федерацияла центрлира кумекбирули саби».
ДурхIначил ва педагогуначил гъайкавхъи гIергъи, Сергей Меликовли дурхIнала лагерьла мер-муса хIердариб. Илини ДР-ла багьудила ва гIилмула шайчибси Министерстволичи лагерьла мер-муса гьарзадарести имканти хIердарахъес хъарбариб, дурхIнас бамсриихъути шуртIри ункъдарес багьандан.
«Солнечный берегла» мер-мусаличиб ба­гьудичебти дурхIни белгибируси ва илди гIеб­бурцуси ишбархIила тIалабуначи балбикибси центр тIашбатахъес пикрибарили саби, Сочилизибси «Сириус» багьудила центр­гъуна.
ГьанбуршехIе, регионна партияла отделениела секретарьли маслигIятбарни хIясибли, ДР-ла багьудила ва гIилмула шайчибси Министерстволи республикала больницабала коронавирусла изайчил бузути тухтуртала дурхIнасра, Сириялизибад чарбарибти дурхIнасра «Солнечный берег» лагерьлизи путевкаби матъал декIардарибти сари.