Республикала къалабали бузуси (мобильный) хIи учидирхъуси станция ишдусра Хайдакьла районнизи бакIиб. Мажалислизиб ЦРБ-ла гьала хIи дедес бакIибти 100-цад адам учибикилри. Иш къиянси замана илдани саби гIяхIъулали хIи дедлугулри. Ил ахъси даражала баркьуди хайдакьлантани гьар дус дурабуркIуси саби.
ХIи касес гьалаб, тухтуртани хIи лугусила бахъхIи биубси (хронический) ва чейхъуси (инфекционный) изала лебал ахтардибируси саби. Илди излуми хIедиалли сари хIи кайсути.
«Нуша гьар дус Хайдакьла районнизи хIи касес дашутира. Бурес чебиркур илаб саби гIяхIъулали хIи дедлугути дусличи-дус имцIабикIули биъниличила. Иличибли багьес вирар Хайдакьла районнизиб урхIла изалара чулайзи халбирути, адамличи уркIецIибирути адамти лебли биъниличила», — бикIи хIи кайсути тухтурти.
Районна бекIли бурни хIясибли, хIи дедни адамли къияндикибсилис кумекла някъ гьабуцнигъуна секIал саби.
Республикала хIи дедлугнила станцияла бекI тухтур Хадижат Танкаевани хIи дедлугнила хIянчи районнизиб ахъли тIашбатес къайгъилизивси Хайдакьла районна бекIлис Баркаллала кагъар бедиб.
