Россиялизиб августла 22-личиб Россияла Федерацияла Пачалихъла байрахъла БархIи дурабуркIуси саби, сабира 1994 ибил дусла августла 20-личибадси РФ-ла Президентла «Россияла Федерацияла Пачалихъла байрахъла БархIила хIекьлизибси» хIукму хьулчили буцили акIахъубси.

Россияла хIябрангла 300 дусличибра бухъянси тарих лебси саби. Пачалихъла байрахъ Россиялизиб акIубси саби 17-18-ибти даршдусмала ургаб, Россия цIакьси пачалихъ саблин кьяшмачи тIашбилзухIели.
КIел бекIличил чIакара сабира цIуба-хьанцIа-хIунтIена байрахъ бегI гьалаб ахъбуцибси урусунала цаибил «Орел» бикIуси дявила гамиличиб сабри, пачалихълис Петр I-ибилла дудеш Алексей Михайловичли бекIдеш дирухIели. Амма илди рангани секьяйда цаладяхъибтил гIялимти ишбархIира ца пикриличи бакIили ахIен.
Сабира Россияла дявила цаибти гамурбачил барх акIубси Россияла байрахъ 19 ибил даршдусличи бикайчи имцIалин флотла культурала гIягIниахъала саблин пайдалабирусири. Ванзаличиб биалли ил пайдалабирес Россияла урхьначиб башутала географиялашалти сагадешуначил барх бехIбихьибсири.
19 ибил даршдус сабаайчи, Россияла морякунани сагали цахIнабирхъуси ванзала дубличи къанч калтIули кали саби. Амма 1806-ибил дусличибад илдани сагаси гIядат кабихьиб. Южный Сахалинна урхьула дуб бяркъур ва дубличи кIел байрахъ катIун: Андреевский байрахъли дявила флотла сархибдеш иргъахъулри, пачалихъла цIуба-хьанцIа-хIунтIена байрахъли биалли – ил Россияла цагьатIи ванза биъни.
Бурес гIягIнибиркур, Совет ХIукуматла Россиялизиб 70 дусра-сера пачалихъла байрахълизи халбирули кали саби хIунтIена байрахъ.
Пачалихъла байрахъла БархIи, августла 22-личир, улкала лерилра регионтазир шадлихъуни дурадуркIути сари.