АхIерти дарганти,
хIурматла гьалмагъуни!
Августла 9-личиб арагIебли дарган мезличил дурабулхъуси, дунъяличибра цайли цаси газетали сунела 100 дус биънила юбилей дураберкIиб. Даршал дус илцадра дахъал хIедиалра, ил замана бухIнаб газетали тарихлашал мягIничебси гьуни ахъиб.
Ил акIахъубсири граждан дергъла ва палакатдешла дусмазиб. Сунела бяхIяназир илини адамтас багьудлуми тIинтIдирулри, ахIерси крайла культура ва тарих гьалабирхьулри. Газета пагьмучебти ва девла устни бетаурти даргала интеллигентуни цалабирхъуси хьулчи сабри. Халкьла мухIлила пагьму бурчули, бучIанти-ургаб ил тIинтIбирули, даргантала социальный бяхIчибизлашалти гIямру сипатдирули, халкьла культура ва гIядатуни даимдарахъес махбикIули – газета халкьла пасихIдешла, даргала литературный мез мяхIкамдирнила ва гьаладяхI дашахънила, рухIла давлала хазнали бетаур. Ил бахъалгъунти писательтала, поэтунала, культурала ва искусствобала хIяракатчибала устадешла школара сабри.
Даршалра дуслизиб нушала дигуси «Замана» газета халкьла гьамадли ахIенти гIямрула летописец сабри, суненира жамигIятла гIямру дархьли сипатдируси.
ДекIар-декIарти дусмазир жура-журала умачил нушала газета хIушала юртанази абицIусири. Дусми аркьулри, уми дарсдикIулри, илкьяйдали барсбикIулри журналистунира. Нуни газетаби-журналтала издательствола унабурхI бегI гьалаб ахъибхIели, нушала газетализиб бузулри чучила лебилра даргантани балути адамти. Газеталис бекIдеш дирулри дила дудеш, журналист, писатель-драматург, тилмаж ГъазимяхIяммад Юсуповли. Илала заместитель сайри ГIиса ТIагьиров. Жавабла секретарь — Ильяс ХIусейнов. Илала бекIдешлиуб бузулри бахъал пагьмучебти адамти. Илди сабри ГIябдулкьагьир МяхIяев, дебали пагьмучевси журналист Запир Харбилов, поэт Ражаб Адамадзиев, ГIябдуразакь МуртазагIялиев, Шамхал Шамхалов, МяхIяммад Рабаданов, Эмин Расулов, ГIябдулкьадир МяхIяммадов, Ибрагьим ГIябдуллатIипов…
Сепайда, илди гьанна нуша-ургаб агара, сецад декIли биалра иличила бурес.
Гьанбикахъес дигулра редакциялизиб бузули калунти машинистка ПатIимат ва бекI корректор Калимат, БяхIяммад Гугаев, Раисат Гиреева, Зугьра Рабазанова (чула гIяпабаркь).
Илкьяйдали газетализир чула пагьмулашалти устадеш гьаргдариб Аминат ХIяпизовани, Хадижат ГIямаровани, НурулхIият ХIусейновани, ГIяшура Мажидовани, ГIялим ГIязизовли, Хасайбат Меджидовани, ХIясбан Амирчупановли, Луиза ЧIянкIаевани, ПатIимат Маллаевани, Хамис Шамиловани ва бахъал цархIилтани. Наб гьанбиркули саби илдас гьалаб бузули калунтала умира уркалахъи ургусра или. Амма илдала уми гьанна тарихлизи мургьила хатIли делкIи сари, илдала къуллукъуни ишбархIи бекIдарес къайгъилизирти нушабра илдала устадешличи лайикьдикес гIяхIцад цIакьани харждарес чебиркур.
Барсбиубли саби арагIебли наслу. ИшбархIи нушала коллектив лутIи-хьулчилизибадал сагабиубли саби. БехIбуцибси гьатIира 100 дус асилдешличил даимбарести адамти бакIили саби. Газетала тарихличила хIушани бучIадая иш номерла бяхIяназибад. Наб биалли, дигулра баркалла багьахъес лебтасалра, хIушаб ишбархIи нушачил дарх диъни багьандан, илкьяйдали баркалла викIулра, гIяхIти баркьудлуми ва у калахъи, нушачибад арбякьунти лебтасалра.
Даргала жамигIят ил мягIничебси байрамличил уркIи-уркIилабад мубаракбирулра, нуша лебтанилра дурхIнала баркьибтас ва илдала биштIатас газета мяхIкамбарили дигулра. Вирхулра, челябкьлализиб нушала наслули «Замана» газета 200 дус биънила байрам дурабуркIниличи.
Лебтасалра чIумаси арадеш, эркинси баракат, талихI, даршудеш ва балгундеш дулгулра! Даргала миллатла рухIла давлали сабси газетала байрам лебилра даргантала дурхъаси байрам саби. Газета ва илала гIядатуни мяхIкамдирнилизи хIушанира белгиси пай кабирхьули, гьаладяхI дашес къайгъибирехIе. Ил бучIантала саби ва бучIантас дурабулхъуси саби. Нуша разилира хIушани бархьиуси гьарил кагъарличи. Дебали дигесли саби нуни гьачамалра чехIебаибти адамтазирад ванати дугьби иргъес, амма нуша газетала кумекличил ихтилатдикIулра. Арали ва мурталра илкьяйдали жигарчертили, секIал багьес дигутили калабая.
Барх бузутас биалли, гьаннала гIергъира гьар бархIиласи бузерилизир пагьмулашалти гьарбизуни ва сархибдешуни диубли дигулра!
«Замана» газетала бекI редактор Арсен Юсупов
