2013 ибил дусла гIебшни ши­лизивад МяхIяч­къа­лализи гечиубси ну хIябал дус хIянчи агарли калунсири. СанигIят хIясибли, ну урус мезла ва литературала учитель сайри. Белики, 40 дусличиб имцIали педагогла стажра лерилра дила хIукуматли гибти шабагъатунира пик­рилизи касили, чидил–биалра шагьарла школализи учительлира уциши, амма ну хьулхIевхъунра. «Диур нуни дарибти мугIяллимла хIянчи», — сабри дила пикри.

КIел дусличив имцIали калунра «Молодежь Дагестана» газетализи урус мезли макьалаби лукIули. Ил газетализиб нуни бузахъуси «ГIямру» бикIуси бяхIра лебсири. Гьар жумягI бархIи нуни ила сегъуна-биалра ца белкI бихусири. ГIур илди дучIуси, «Дагестанская правдализив» 50 дус узуси, публицистикала шайчибси ДР-ла пачалихъла литературала премия касибси ГIябдуряхIман МяхIяммадовли дила белкIанала жанрлис «документальный рассказ» бикIуси у бедибсири. ИшбархIира урусла ва дарган мезличил нуни лукIути хабуртала жанр ил саби.
ЖумягI бархIи «Молодежь Дагестана» газетала редакциялизи вашуси ну, касили дила макьала сунези кабяхъибси ил газетала номер, цацахIели «Замана» газетала редакциялизира дила шан, унра МяхIяммад Рабадановличи гьавикIусири.
«Замана» газетала редакциялизиб бузутани «Молодежь Дагестана» газетализи кадяхъибти дила лерилра хабурти дучIни багьурхIели, пахрули бицIибсири дила уркIи. «Агь, Мурад, Мурад, 50 дус гьалав хIу газетализив узес гIягIнисири, дубуртази дигIянхIейкили», — ибсири гьачам набзи Запир Харбиловли. Илала илди гъай нуни дила творчестволис гибси ахъси кьиматлизи халдирутири. МяхIяммад Рабадановли бурули нуни багьурра, «Замана» газетала редактор Арсен Юсуповлира дила хабурти дучIули виъни. ГIяхIдилзули диэс гIягIнитири илди илисра. Ил багьандан урги ну илини итцадра гьамадли «Замана» газетала корреспондентла хIянчиличи уцибсира.
Ну «Замана» газетализив шел дусра имцIалира узулра.
Газета 95 дус биънилис гибси дила ХIурматла Грамотара леб. Бархьси саби, илабси белкIлизиб наб гIяхIла шайчи хатIара барили саби. ЦархIилтас делкIунти ишди дугьбихIели («мубаракирулри газета 95 дус биъниличил»), наб белкIи саби «мубаракирулри 95 дус виъниличил» или. Ил белкI нуни бахълизи чебаахъира. «ГьатIира гIяхIсигу ил. Чула дугьби дархьтили урдухъахъес багьандан, хIу 95 дус виайчи редакциялизив узес гIягIниси саби», — бикIутири ил чебаибти. Баркалла биаб чус. Наб биалли, илдала балгни хIясибли, гIурра 20 дусличивра имцIали газетализив узес гIягIниси саби (Кьабулбарая иш нуни чедиб бурибси масхарара). Нуни бурибсиличи хIедирхадалли, дакIирая чебаэс ил грамота: дила кабинетла бяхIлизиб чебяхIкахъили лебну.
БусягIят ну узуси коллективличил жявлил узуси виаслири, гIуррара 200 дусцадхIи узес вираси. Дила жагьхIелла дусмазив ну дахъал коллективтазив узули калунсира, амма ну бусягIят узуси «Замана» газетала коллективгъуна наб дила гIямрулизиб къаршихIебикиб бургар, бекI редакторличибад бехIбихьили, техничка Гулжанатличи бикайчи. Ахирра гIямрулизив наб дигуси хIянчили виркьес бикнилизиб бургар ил анцIбукьла сабабра.
Ну газетализив узути шел дусла бухIнаб коллективлизибадти шел адам нушачибадли ахиратлизи арбякьун: ГIябдулкьагьир МяхIяев, Запир Харбилов, МяхIяммад Рабаданов, Раисат Гереева ва Зугьра Рабазанова, Аллагь бунагь-хатIаличивад чевверхабну чула. Баласра, газета 100 дус бирнила юбилейличил, 95 дусла юбилейличилван, мубаракхIедирура нуша МяхIяммад ХIямидовли, Жамбулат МяхIяммадовли, ШапигI МяхIяммадовли, Расул Балгъуевли, ГIябдулмуъмин Зулпукьаровли. Илди пергер адамтанира нуша дархьдатурра. Гьалжанализи рухI хьурадараб чулара.
МажахIят бакIес, гьалабван, нуша газетала 100 дусла юбилейличил мубаракдарес цархIилти газетала юлдашунира: урухбарили саби илди лебилра коронавирусла чейхъуси изай.
Заманали кьалли сунела дуцI тIашиуси ахIен. Даршани дус гIурра даргантачил кавлуси саби нушала «Замана». ХIушаб бегIлара дигуси газетала юбилейличил, ахIерти дарганти!