Ва хIурматла «Замана»,
Башен хIу дила хъули,
Сагати хабуртачил
ХIекьли гIяхIси гIяхIялван.
Ассаламу гIялайкум, хIурматла «Замана» газетала хIянчизарти! ХIуша лерилра мубаракдирулрая, нушала газета 100 дус биънила байрамличил. ХIушаб арадеш, разидеш, бузерилизир сархибдешуни дулгулра. Дарганти разибирути макьалаби лукIесли хIушала кьалам гьатIиралра бугабикIаб.
Ну балугълариубхIейчирад тянишсира даргала газеталичил. Дила бегIтани ил кайсусири ва бучIусири. 1934 ибил дуслизив дила дудеш Чамсулвара ГIялиев Ванашимахьилизив Тахо-Годила у бихуси колхозла председатель вири. Илини мурталра кайсусири «Ленинна байрахъ» газета. Дила нешлис ил газета дебали дигахъи. Нуни газетала бяхIяназирти назмурти дучIули рираси. ИмцIаливан иргъути уми дири И.БяхIяммадовла, Х.Сулайбановла, С.Рабадановла, Р.Рашидовла ва цархIилталара.
Къяббердни агарли гьар дус «Замана» газета дила хъули башуси саби. Дила мурул Амирхайра кайсусири ил газета ва, макьалаби делкIи, кадяхъяхъес редакциялизи дурхьутири. Набчил барх педучилищелизиб бучIули калунти дарган узби ва рузби Р.Адамадзиев, П.МяхIяммадова, ГI.МуртузагIялиев, вузлизив варх учIули калунси пагьмучевси писатель, кайзурси дарган гъабза Гъ.Юсупов, дила кьаламла узби Н.Сулайбанов, Р.Бадирханов, М-Ш.ГIисаев, Ш.МяхIяммадов, дила нешла рузикьар Р.Гиреева илаб бузни багьандан, газета наб дигахъусили бетаур. Ила лукIутири дарган мез гьаладяхI ардукес халаси къайгъибирути ва сабухъчебли бузути журналистуни, гIялимти, писательти: И.Ибрагьимов, А.ГIябдулманапова, ГI-А.МяхIяммадов, ну ручIахъули калунти учительти Басир ГIямалаевич, Албури Албуриевич, ГIялибек ГIялибекович…
Ну 1989 ибил дуслизир МяхIячкъалала физикала-математикала 8-ибил лицейлизир дарган мезла мугIяллимли рузес рехIрихьибсири. ИтхIели ну литературала мезли гъайрикIахъес «Замана» газетали халаси кумекбарибсири. Нуни бучIахъути дурхIнира ил газеталичил гьалмагъбикахъира. Илдани, байрумтачил дархдасахъи, чула бегIтас, хала бегIтас, бузерила ва дявила ветерантас, мугIяллимтас газетализи мубаракла дугьби лукIи ва газета дурабухъайчи хIерли бири.
1992 ибил дуслизиб бускран БяхIяммад ХIябибуллаевичли дила класслизиб гьаргси дарс дураберкIибсири. ХIурматла узи, хIуни наб делкIунти ванати дугьбас халаси баркалла! Ит хIела дарс дурхIнасцунра ахIи, набра багаласили бетаур.
2013 ибил дуслизиб Гьалмагъдешла Юртлизиб «АхIерси газета» бикIуси балбуц бетерхурсири. Иличи нуни дила ученикуни букибтири ва назмурти делчIахъунтири. А.Юсуповли ва С.ГIялиевани дурхIнас жузира газетабира савгъатдарибтири. Илкьяйдали нуша газетала редакциялизира дякьунтири. Илар газетала бекI редактор Арсен ГъазимяхIяммадовичли ва депутат МяхIяммад МяхIяммадовичли дурхIнас грамотаби, жузи, савгъатуни дедибтири. Корреспондент ГI.ГIязизовли далай белчIи, дурхIни разибарибтири. Илди гьунибаъниби нешла мез гьаладяхI дашахънилизи кабирхьуси пай сабри.
«Замана» газета, хIу бучIути бахъбикIули, хIу дигахъути гьалмагъунала хъули бегIлара гIяхIси гIяхIялли абицIули ва гIяхIла хабурти дурули, байрахъван ахъли калаби. «Замана»-ла агьлулис ва лебилра даргантас талихIчерти гIямру, чIумаси арадеш, разидеш, баракат, даршудеш, диги дулгулра. Илкьяйдали «Прессала мургьила фонд – 2021» лебил Россияла конкурсличиб цаибил мер сархниличилра уркIи-уркIиларад мубаракдирулрая. ГIуррара дахъал сархибдешуни дирахъес, арали калабая, ахIерти газетала хIянчизарти. Дерхъаб нешла мезра дарган газетара!
