Керила баркьуди

Дурхъаси хIядислизиб Идбагли ** буриб: «Чили чякала пукьацадалра мижит баралра, илис ЧевяхIси Аллагьли (а.т.) Алжанализиб кIялгIя биру».

Гьалабра багьахъурли кьяйда, Дагъистайзир Европализиб бегIлара халаси ГIиса Идбагла (гI.с.) уличилси Динна Идарала Центр тIашбалтнила хIянчи детурхули сари. Ил Центрлизи кадурхути сари: МяхIяммад Идбагла (с.гI.в.) уличилси мижит, мадраса, школа, дурхIнала анхъ, библиотека, бамсри ихъуси парк ва цархIилтира.
Лебил Дагъиста шими-шагьуртазибти жамигIят учибикили, чули бирусигъуна кумекбирули саби, дигалли някъла хIянчили, дигалли арцлашал.
Дахадаевла, Бабаюртла, БотIлихла, Шамилла, Къизи­люртла, Къарабудагъкентла, Лавашала, Хасавюртла, ЧIярадала ва дахъал цархIилтира районтала, Избербаш, МяхIячкъала, Каспийск, Къизлар, Къизилюрт, Хасавюрт шагьуртала жамигIятли арцра дучили, дурабуркIуси билхъализибра кумекбариб.
МяхIячкъалала мижитунала имамтани жибарни хIясибли шагьарла жамигIятли 7 бархIила духIнар 4 миллионничир имцIали арц дучили Центрлизи дедиб.
Къизилюрт шагьарла ва Къизилюртла районна жамигIятли мижитла къубба барес чеасиб ва 6 миллион арцла дучиб. Къубба таманбарес биалли 13 миллион арцла гIягIнити сари.
Халатицун ахIенну биштIати дурхIнира ил Центр тIашбалтнилизиб бутIакьяндеш дирули, чус велосипед, телефон ва цархIилти ваяхI асес дурчути арцла тIакьни хили башули саби. Ил Центр тIашбалтни гьарли-марси лебилра халкьла билхъа бетарули саби.
ХIера, илкьяйдали машгьурси спортсмен КьурамяхIяммад КьурамяхIяммадовли сунела «мерседес» савгъатбариб, Бабаюртла районна жамигIятли биалли «тайота» машинара бедили, арцра дедиб.
Илала дурабадра гIебшни «Шиниша километрти» бикIуси уличил парк бетаахъес галгуби удалтули бехIбихьиб. Илаб, билхъаличи бакIибти галгуби удалтулира бузули саби.

Нушани гьалабра бурили кьяйда, Мя­хIяч­къа­лализиб тIашбалтуси ГIиса Идбагла (гI.с.) уличилси динна Идарала Центрлис дигусини чули бирусигъуна кумекбирули саби. Гьалабванра Ростовла ва Ростовла областьла имамтала кьукьяли илар бутIакьяндеш дариб ва галгубира удатур.
МяхIячкъалала ГIябдулрашид Саадуллаевла уличилси спортла школализи башути спортсментани биалли арц учидяхъес кьасбариб. Сай олимпиадала чемпион ГIябдулрашид Саадуллаевли биалли, Центрлис квартира пешкешбариб. Илкьяйдали чули бирусигъуна кумекбарахъес, илдани ХIяйдарбек ХIяйдарбековла спортла комплексра жибариб.