Дунъя акIублара халкьличи жура-журала излуми чедашули, бахъал адамти агарбирули калниличила тарихлизиб бурули леб. Дебали вайти излуми — чахьа (оспа), вабаъ (холера), ружерила (малярия), аринжла (корь) ва гIяхIцад цархIилтира гьаман дакIудулхъули, бахъал адамтала гIямру къябиули кали сари. Лерилра илди урехила излуми агардарес кумекли бетаурси ца секIал саби —вакцина. Илди излумачи къаршили прививкаби дирухIели сари агардиубти.
ГIергъиси замана дакIубиубси коронавирусла изайзибад мяхIкамдеш барахъес кумекли бетаруси вакцина саби, илхIелира чумал журала, — халаси гьунар саби нушала улкала гIялимтала ва тухтуртала.
Гьалар сайтанира, сетанира, илдазир тIинтIдирути гъай-мезра агархIели, адамти тухтурла гъайличи бирхкарутири. Ил сабабли прививкабира дирахъутири. Гьанна биалли жура-журала багьахъниби дучIули, ташмишбикIути лебни дигIяндеш ахIен.
Дила пикрили, гьарил адамла виэс гIягIниси сай сунела тяхIяр-кьяйда гIяхIил далуси тухтур. Илини хъарбарибсира, гIеббурибсира бирес чебси саби. Гьай-гьай, ажал даалли, чилилра селра барес хIейрар, амма вакцина барили гIергъи, ил кункли шалгIеббулхъниличила аргъахъиб райбольницала тухтур ГIялихIяжи БяхIяндгIялиевли. Илала гъайличи лехIяхъили, нуни кIелра яргалис вакцина барахъира. Наб гьанбиркур адамти замана аркьуцад пикрибулхъан ва чула арадешлис дебали манпагIятси ил баркьудила гIяхIдешличила бархьли иргъу или.
Россияла вакциналичи дахъал дурала улкнала халкьра бирхкаурхIели, вакциналичибли гIяхIдеш бетарни аргъили, нуша васвасдикIес асухIебирар! Гьанбиркули саби: эгер ил вакцина Россияла хIебиубли, Америкала биубси биалри, ургакабикили бирахъуси бурги или, — сенахIенну бахъалгъунти адамтани чула лебси кьиматлабарес хIебални гIячихъбирули саби.
