Республикала чейхъути излумала шайчибси стационарлизиб арадеш къулайбирули саби биштIати дурхIначибад бехIбихьили 18 дусличи бикайчити гIямрула жагьилтани, ­илди-ургаб леб иза декIти асуртачилтира. Лебилра ­республикализибад ­коронавирусла чейхъуси иза декIти асуртала бегIти дурхIни ила бяхIбирути саби. РЦИБ-ла тухтуртала бузерилизир дурхIни ­берцахънила тамашала анцIбукьуначилра бяхIягиб. ГIергъиси ­замана хъалибаргунадли адамти больницализи кабиркьули саби.

ДурхIнала декIти асурти дагьардулхъули сари ­чархла биркIанти вайдиубли, кьаркьала руржниличибли ва гьигь ­бурцниличибли. Иза гьалар-гьаларти лишанти, имцIатигъунти анцIбукьуназир, къяналатили урдулхъули дирар — илди сари ­даргмахличил дархдасунти, сурс-кьакьари изесбяхIни.
Жагьилти ва дурхIни коронавирусла изай декIли зягIипбиркахънила анцIбукьуни хIисабдиубли сари Дагъистаннизирцун ахIенну, арагIебли дунъяличирра. Изайзибад мяхIкамдеш бирнила бекIлидиубти тяхIурти, гьалар кьяйдали, гьаннара сари: цаличибад ца тяйдили буъни ва жамигIятла мер-мусаличир дяхIликалаби дихни, COVID-19 изайчи къаршили ­­вакцина ­барахъни. Ахтардлумала баянтани чейхъуси иза ­дарсдиубти ­журабас къаршидеш дирнила асарчебдеш чебиахъули саби. ДурхIни хаслира мяхIкамбарес багьандан, гъамтала ил урехиласи изайчи къаршиси иммунитет биэс гIягIниси саби.