ДР-ла БекIла къуллукъуни заманалис дузахъуси Сергей Меликовли совещание дураберкIиб ва Каспийск шагьар гьалабяхI башахъести суалти хIердариб.
Сунела пикри буриб Каспийскла мэр Борис Гонцовлира. Илини бегI гьалаб аргъахъиб, нуша гьаладяхI дашес багьандан, муниципалитетла хIякимтас бекIлидиубтили сарти дужути шин дашахънила ва ардашахънила масъулти арзес гIягIнили биъни.
«Илди масъулти нушани бегIлара гъамси заманализир арзес гIягIнили сари, ва, эгер нушани гьанна жамигIятлис гIямрула шуртIри кахIедихьахIелли, дахъал хъулрала юртани шинничил гIердурцес хIедирехIе. Илгъуна аги саби хутIличилра», — викIи Борис Гонцов.
Транспортла кабизра гьалабяхI башахъес вирниличилара буриб мэрли, сунела ихтилат даимбирули. Ил шайчиб цаибил яргаличиб Маячная кьакьа балбарес хIяжатли биъниличила буриб, сабира МяхIячкъала – Аэропорт хан гьуниличибад Каспийская флотилия лебси мерличи аркьуси.
Сунела яргализив гъайухъунси Сергей Меликовли пикрила дайлар дихIес гIягIнити хIябал бяхIчибиз декIардариб.
«Хъулри лушнила шайчиб Каспийск дебали гIяхIси ва адамти битIикIуси шагьар саби. КIиибилгъуна – туристунас гIяхIбизесира саби, сенкIун аэропорт, урхьу ва республикала тах шагьар гъамли сари. Амма ил кьяли ишаб гьалабяхI башахъухIели, Каспийскла жамигIятла ихтиюрти дулэс асухIебирар. ХIябъибилгъуна бяхIчибиз – промышленностьла мерани. Нушала лерти предприятиеби: «Дагдизель» завод» АО, «ХIяжиевла уличилси завод» АО, «Уйташ» инвестициябала майдан гьаладяхI дашахъес гIягIнибиркур, амма цуг-цугли.
Илала дурабад, Сергей Меликовли гьанбушиб, Каспийск улкализибра халаси урхьула-дявила флотла цалабяхъ лебси шагьар биъниличилара хъумартес асухIебирниличила.
