Республикала БекIла къуллукъуни заманалис дузахъуси Сергей Меликовли СКФО-ла экономикала-социальный бяхIчибизла масъултала шайчибси Правительствола комиссияла члентачилси совещаниела бузерилизир бутIакьяндеш дариб. Ил бетерхур Пятигорсклизиб улкала Правительствола Председатель Михаил Мишустинна бекIдешлиуб.
Регионти гьаладяхI дашахънила челябкьлаличила ва бекIлидиубти масъултачила гъайбикIули калун. Северный Кавказла экономикалис туризм бекIлибиубси бяхIчибизли бетаъниличила аргъахъиб.
Сергей Меликовли буриливан, аргъбаибси масъалали кавлули саби белгиси кьялила сурсатуни гIягIниси тяхIярли пайдаладарни, ил лугIилизир – шимала халкьлис лайикьти шуртIри акIахънира.
Дагъистаннизир 20 процентличирра имцIали Россияла мазала-мас ва гIежни лерни халбаралли, мицIираг гечдирнила кабизличира пикри бяхIчиаэс чебиркур. Субъектла БекIли Къизларла мицIираг дуки дикути мер-муса дукьдуънила масъалара гьанбикахъиб.
«ТIутIи дашахънила ва чягъир дирнила масъултира гьунчидиркахъулра, гьайгьайрагу, масани дурайъантас гIяхIти шуртIри алкIахъниличила хъумхIертурли.
Промышленностьличила гъайикIалли, 2020-ибил дуслизир дурайути масанала кьадар 104,5 процентличи абикиб. Республикализир индустриальный 6 парк, 2 ТОСЭР, инвестициябала проектуначил узнилис хасбарибси офис акIахъубли лер», — багьахъур ДР-ла БекIла къуллукъуни заманалис дузахъусини.
Сергей Меликовли пикри бяхIчихIеили кахIелун регионна инфраструктурала, халкь шинничил гIеббурцнила ва нясдешуни ардашахъес хасбарибси канализацияла масъултачира. Иличил бархбасахъи, регионна БекIли МяхIячкъалализир шин умудирути гIягIниахълуми къулайдарес хIяжатли биъниличилара буриб. Республика гьалабяхI башнилис диргаладулхъути гьалабизуни сарлин, гьандикахъиб ТЭК-ла масъултира.
С.Меликовли сунела пикри-хIер тIашаибси цагьатIи масъалали уббухъун МяхIячкъалала аэропорт сагабарнила, къулайбарнила масъала. Ил бархбасунси саби самолетуни урцахъес-кадирахъес хасбарибси сагаси полоса бирниличил, илхIели гьарахъли дашути «гьавала гамурби» кьабулдиресра имканбикIур.
