ЗягIипбикибтала лугIи имцIабиъни багьандан

Ишди бурхIназиб Сергокъалала районна мер-мусаличиб коро­навирусла чейхъуси изала тIинтI­хIе­бирахънила шайчибси штабла заседание бетерхур. Штаб бучнилис сабабли бетаур изайзи биркутала лугIи имцIабикIни. Рай­он­низиб 59-цад адам зягIипли саби.

Районна больницала бекI тухтур ГIяли БяхIяммадовли буриливан, «хIунтIена зонализи» цархIилти отделениебазибад чеимцIали тухтурти жибарили саби. Бахъалгъунти зягIипти ХIурхъила шилизибадти саби.
Роспотребнадзорла Избербаш шагьарлизибси отделла руководитель Айнулла ТIа­гьировли багьахъурливан, имцIаливан адамти ил изай зягIипбиркули саби, мукърачи (40 процентла кьадарлизиб) ва муръа-бялгIяличи (22 процентла кьадарлизиб) башухIели.
Заседаниела баянти хIясибли, хIукмурти кьабулдариб. Ил лугIилизир: июньна 16-личибад ХIурхъила ши карантинничи гIекIес. Шилизи ухIнаухъес ва дураухъес асубируси ахIен. Илкьяйдали дяхIликалаби дихнила тяхIяр-кьяйдара цIакьдарили дирар. ЗягIиптачил бархбасуни кадизахъурти адамти хъулиб буахъниличира хIеруди имцIабарили бирар. Къадагъабирули саби бахъал адамтала бутIакьяндешличил далдуцуни дурадеркIахъесра.
Илди къадагълуми уркайсути ахIен, аги-кьяйда къулайдиайчи, камхIисабдан, кIел жумягIялра!!!
ГьанбиркахъехIе, чейхъуси изала тIашиути тяхIуртазибад бегIлара асарчебси саби вакцинаби дарни!
ШутIни-къунбачи пикри бяхIчимайидая, специалистуначицун дирхеная! Реанимациялизи кадихьи, ИВЛ хасси гIягIниахъалаличил гьигьдикIесичиб, прививка барахъни гIяхIси саби!