Европала чемпион

Советский Союзла Игит С.Кьур­бановла у бихуси Пер­во­майскла урга даражала цаибил шко­лала 9-ибил классла ученик азадли мушулбашнила шайчив Европала чемпион ветаур.

Абзани детерхуртири Софиялизир майла 27-личирад 30-чи бикайчити бурхIназир. Дагъистаннизивадси 16 дусла гIулухъа МяхIяммад Мя­хIяммадов 38 килограммла битIакIлизив му­шулвашуси сай. Илини бахъал сайгъунти муш­лукьяби гIелаб батур: ахирлати абзаназив — Польшализивадси Бартош, полуфиналлизив – Ук­раинала мушлукья. Финаллизив 10:0 счетли­чил МяхIяммад чедивикиб Грузиялизивадси Матэ Цинадзечивад.
МяхIяммад акIубси сай 2006-ибил дусла апрельла 6-личив Къаякентла районна Первомайское бикIуси шилизив, бахъал биштIатала бегI хъалибарглизив. Илизир спортличи диги адикьурти сари дудеш Рабазан МяхIяммадовли. МяхIяммадла неш Сакинат ГIялибековна урши учIуси школализир математикала учительницали рузуси сари.
МяхIяммад дебали белчIудиличи чекайзурси учIан сай. Ил «5» ва «4» кьиматуначил учIуси сай.
Европала чемпион ветаайчира виштIаси мушлукьяни цархIилти абзаначирра дахъал чедибдешуни сархибти сари. Ишдус ил чемпион ветаур Дагъистанна мер-муса хIясибти ва СКФО-ла абзаначив, Россияла цаибил мер багьанданти мушулбашнила абзаначивра ил чедивикиб.
Первомайскла урга даражала цаибил школала коллективлира спортла шайчибси халаси чедибдешличил Европала чемпион МяхIяммад МяхIям­мадов ва илала тренер Расул МяхIяммадов мубаракбирули саби. Илдани МяхIяммадлис гIуррара чедибдешуни далгун.