Нушала республика дебали маш­гьурси саби сунела декIар-де­кIар­ти сурсатуначибли. Жагаси тIа­­би­гIят, хъярхъти дубурла хIуркIби, Каспи ур­хьу.

Илкьяйдали Дубуртар Улка машгьурси саби нушачиб хIербирути адамтачиблира. Гьарил шилизиб чула игитуни, жамигIят-ургаб хIурмат сархибти, чучила хабардерхурти адамти лебти саби. Илдигъунти адамти бахъал леб МикIхIила шилизибра.
Гьалабван, МикIхIила спортла школала цаибси директор, машгьурси спортсмен, урибси гIялим, профессор, Россияла урибси учитель ХIясбулла МяхIяммадович Арсланбеков гьаниркахъули, Лавашала районнизир волейболла абзани дурадеркIиб. Илизир 2004-ибил дуслизиб акIубти ва гIуррара биштIати дурхIнани бутIакьяндеш дариб, арагIерли — 13 командали. Илдазирад авал команда рурсбала сарри. Абзанала сиптакарли бетаур МикIхIила шила спортла школа.
Илди абзани детерхахъес халаси кумекбарибсири ХIясбулла МяхIям­ма­до­вичла дурхIни Руслан ва МяхIяммад Арсланбековхъалани. Илкьяйдали шила адамтанира икьалабарибсири.
Буралли, гьарил командали гIяхIти устадеш чедаахъиб викIес хIейрус. Амма гьарил дурхIяла чедибдеш сархес халаси иштяхI лебри. Рурсбала командаби-ургаб чедибикиб МикIхIила шила команда, уршбала ко­мандаби-ургаб биалли — Чуни шила команда.
ГIядатли бетаурливан, волейболла абзаназиб Чунила, КьутIишала ва Няскентла командабани гIяхIти устадеш чедиахъули дирар. Илди цархIилтачир бекIла ахъли сари викIаслира, хатIахIеркус. ХIера, иш гьакIлисра илди чедидикес бажардидикиб.
Спортла школала директор Чамкур ХIябибович Чамкуровли абзанала ахирличиб лебилра гIяхIлас ва командабас баркалла багьахъур. Илдигъунти далдуцунани шимала ва адамтала ургарти бархбасуни уржибтили детарахъниличила буриб. Шила спортла школали, администрацияла кумекличил, гьар мурталра декIар-декIарти далдуцуни дурадуркIниличилара багьахъур. Гьаннала гIергъира илдигъунти далдуцуни имцIали дурадуркIехIе или буриб.
Чедидикибти командабас грамотаби ва кубокуни дедиб. Илкьяйдали МикIхIила шила спортла школала директорла заместитель Жамиля МяхIяммадовна Ибрагьимкьадиева, Лавашала районнизиб спорт гьалабяхI башахънила шайчибси ункъси бузери багьандан баркаллала кагъар­личил шабагъатларариб.