Апрельла 5 нушачиб дарган мезла БархIилизи халбируси саби. Илгъуна дигеси анцIбукьличил бархбасахъи, республикализиб хIербирути даргантала рухIласи давлали бетаурси «Замана» газетала редакциялизи декIар-декIарти санигIятуни дузахъути хIурматла гIяхIли цалабикиб. Илди сабри ДР-ла халкьла поэт Аминат ГIябдулманапова, Басират ХIусейнова, Р.ХIямзатовла уличилси Миллатла библиотекала хIянчизар Салимат ХIяжиева, даргала радиовещаниелизир рузуси Саният Шапиева, «Гьалмагъдеш» журналла редактор Кьади ГIялисултIанов, драматург Раисат Ибрагьимова, дарган мезла мугIяллимти Зубайдат ХIусейнова, Нарижат Ибрагьимова, Зайнаб Рашидова.
Нешла мез мяхIкамдирнилизиб ва гьаладяхI дашахънилизиб бузути илдани ахъбуцибси масъалара дарган мез хIедебкIахъести тяхIурти пикридарни ва даргала интеллигенцияла вакилти цабиахъубли, ил масъала гьунчибикахъни сабри.
Балбуцличир гьарилли чула пикруми дуриб ва «Цадеш» бикIуси кьукья акIахъубли, чеалкIуси наслулизи дарган мез руркъяхъни жигарчеббарнилизиб ил бузесаэс пикрибариб.
Ишдуслизиб «Замана» газета 100 дус бирнила шадлихъ дурабуркIуси саби. Иличил бархбасахъи, редакцияла бекI редактор Арсен Юсуповли халаси къайгъи дакIубирули сай декIар-декIарти далдуцуни дурадуркIес. Иш гьакIлисра илини челукьуси масъалари гьалабихьибси. ГIяхIланира ил иштяхIличил гIеббуциб ва гьар базлизиб газетала тарихличил ва мезла детуцуначил дархдасунти масъулти ахъдурцули, декIар-декIарти далдуцуни дурадуркIес пикрибариб. Илдигъунти далдуцуначи гIурра жибирути саби гIилмула, педагогикала ва цархIилти бетуцуназиб бузути адамти, даргала шелра районна къуллукъла хIянчизартазибадли цацабехIти, школабала бучIанти, студентуни.
Илкьяйдали, лебталалра пикриличи лехIдизурли, челябкьлализир дарган мез хъумхIертахъести тяхIурти далдурцниличила масъала гьалабирхьуси саби. Илдигъунти далдуцуни дурадуркIалли, белики, школабазир нешла мезла сягIятуни имцIадарес, миллатунала мезаначил дурадуркIути далдуцуни дурхIнас дигутили детаахъес мугIяллимтанира кьасбарес, жузи, газетаби ва журналти дучIес илдала иштяхI имцIабиэс.
