ХIяракат бетурхахъули

Ишди бурхIназиб Ахъу­­шала районна хозяйствобазир ма­за­ла мас думгнила хIяракат бе­турхули саби. Дусла бухIнаб мицIираглис барибси къуллукъ дигахъуси саби ил манзилла сабухъчебдешлизибадли.

Янила къиянти аргъ-бар­хIи­личи хIерхIеили, бахъалгъунти мицIираг адилкьантала гъай хIясибли, гIяхIси даражаличир сари жакъни, чебетаибси къуллукъ гIеббуцили саби мукь­рас.
Маза думгнила хIяракат­ли­чи мицIираг адилкьанти ункъ­ли хIядурбиубли саби «ТIе­­бекмахьи» СПК-лизиб. Гьа­­лабван, хозяйствола ми­цIи­раг адилкьути мер-му­са­личи гIяхI­­ладли бякьун «ТIе­бек­ма­хьи­­ла шила совет» МО-ла хIян­чизарти.
ГIяхIладли бякьунтала лу­гIи­лизибадлири «ТIебек­ма­хьи­ла шила совет» МО-ла бекI М.Мажидов, районна Собрание­ла депутатуни, «ТIебекмахьи» СПК-ла правлениела членти М.Ра­баданов, М.ГIяб­дуллаев ва илкьяйдали «ТIебекмахьила шила совет» МО-ла депутатунала шила Собраниела депутатуни М.Расулов, Р.Мажидов, Р.Кьурбанов ва ГI.Рабаданов.
ГIяхIли тянишбиуб ми­цIирагли яни буркIахъути мер-мусаличил ва хозяйстволизиб мазала маслис къуллукъбирнила бузериличил.
ИшбархIилис хIяжатти ду­­­ге­­ниличил хозяйство гIеб­бу­ци­ли саби, мицIираглизи яни ункъли беркIахъили саби, заманаличир дурадеркIили сари ветеринарияла-мяхIкамдешла далдуцуни.
«ТIебекмахьи» СПК-лизир 8167 жакъа лер, илдазирадли 3266 демгурли сари ва 94 процентла кьадарлизир мукьри гIяхIси даражаличир сари.
«ТIебекмахьи» СПК-ла пред­седатель ГIяшурлав Юсупхановла гъай хIясибли, хозяйстволизиб гIяхIси хIядурдеш барили саби хIебла ризкьи делгIниличира. 75 гектарла ванза баци саби ва ишдусла шила хозяйствола хIебла ризкьи дегIес хIядурбарили саби.
Даарила кьадарлизир люцернала, нихъяла ва суданкала гье тIалабдарили сари. Гъамси манзиллизир илди делгIнила хIянчира дехIдирхьур.