Гьаларван Чувашияла Республикала Новочебоксарсклизир чула арадешлизиб нукьсандеш лебти жагьилти рурсби ва уршби-ургарти кункси атлетикала «Кубок России – 2021» бикIути абзани детерхур. Илдазир нушала Хайдакьла районна МашатIдила шилизирадси Сабина МяхIмудованира бутIакьяндеш дариб.
Кубоклизи улкала 44 регионнизибадти 200 спортсмен каберхур. Илди-ургаб нушала республикала командара лебри. ХIябал бархIи духъяндитIунти абзани чумал бутIализирад цаладикилри: дуцIбикIни, ядро иргьнила, ахъдешличи ва гьарахъли тIяхIбулхъни. Илар жагьилтани чула рухIлашалти цIакьдеш, хъярхъдеш ва чедибдешличи гъира чедаахъиб.

Сабина МяхIмудова ядро иргьнилизир абзрухъун ва, 4,26 метрла гьарахъдешличи ил игьубси илини хьунул адамти-ургаб цаибил мер сархиб. Сунела 22 дусла гIямрулизиб илини бегI гьалаб сабри илгъуна халаси даражала чедибдеш сархибси.
Рурсила тренерти сабри ДР-ла Пачалихъла университетла спортла дисциплинабала кафедрала доцент Альберт Рзаев ва кункси атлетикала преподаватель, ядро иргьнила шайчир чуйнара чемпион ретаурси Шахсенем Куджаева.
Россияла кубоклизиб 1-ибил мер сархни багьандан, Сабина МяхIмудова Чувашияла Республикала физическая культурала ва спортла Министерстволи ХIурматла Грамоталичил ва Россияла 1-ибил даражала медальличил шабагъатларариб.
Чихъти устадеш, гъирачебдеш ва рухIлашалти цIакьдеш чедаахъибси Сабина 1-ибил мерличил илкьяйда мубаракрирули сари Хайдакьла районна бекI ГI.Темирбулатовлира.
«Илцадра халаси кьадрила абзаначиб цаибил мер сархни арадешлизиб нукьсандеш лебси адамлис – ил сунечив сай узнила, сунечи халаси гужбарнила ва хIебулкIахъуси гъирачевдешла лишан саби. Спортла ареналичиб жагьилти уршбани ва рурсбани чедибдеш сархуси, сунела мушлукьячибцун ахIенну, сунечибра саби. СенкIун илини сунезирти урехи ва ташмишдеш агардирахъули сари.
Сабина МяхIмудова ва илала тренерти уркIи-уркIилабад мубаракбирулра. ХIушала цIакьани кIиркадиаб ва лерилра кьасани гьардизаб!», —викIи ил.