«Двигательстрой» — ил­гъуна у бихусири гьа­лаб нушала Кас­пийск шагьарли.
Ил 20-ибил даршдусла бехӀ­бихьудлизиб хӀян­чи­зар­­тала ши кьяйдали акӀа­хъуб­си­ри. Гьарил дигусилис ила укьес асубируси ахӀенри. 1947 ибил дуслизиб ил гьарли-марли шагьарли бетаур ва «Каспийск» ибси ура бедиб, сабира Каспий урхьула дублаб мерлабиубси.

Гьанна Каспийск МяхӀяч­къа­ла шагьарла, би­кIу­ли­ван, някъ гьабатурси мерличиб, ун­раличиб са­би. Ил тах шагьар­личил барх ганзбикӀулира хIи­­­саб­­­ба­рес вирар. Буралли, Кас­пийсклизиб, МяхӀяч­къа­ла­лизибад декIардеш, гьундурала шайчиб се­гъу­налра «гъузгъалдидеш» агара. Гьайгьайрагу, илаб машинабала лугIира, тах шагьарлизибван ахIи, камли биъ­нилизибадра бургар.
СССР-ла замана акӀахъубси «Дагдизель» завод Кас­пийск­лизиб гьаннара бузули саби, гьалабван бахъал хӀян­чизарти агарли биалра.
Арбякьунси дусла октябрь базличиб ДР-ла БекӀла къуллукъуни заманалис дузахъуси С.Меликовли МяхӀячкъалала ва Каспийскла юртани лушнила тяхIяр-кьяйдаличи хаслира пикри бяхӀчиаиб. Илала гъай хIясибли, дахъал юртани гӀягӀниагар мерличир дарили сари, шагьарла сегъуналра жагадеш пикрихӀебарили. Ил багьандан, гьанна кӀелра шагьарла сипат къулайбирнила шайчир мягIничерти хӀянчи дурадуркIули сари.
Республикализиб гӀергъити дусмазиб туризм дебали машгьурбирули саби. Каспийск биалли, тах шагьарла мякьлаб саби, ил багьандан илра жигарчебли гьалабяхӀ башахъес чебиркур.