Лавашала районна бекI Шамил Дабишев районна шимала шантачил гьунивиънила далдуцуни дехIдихьили сари. Гьунибаънибала мурад саби шантала челукьути масъулти аргъни ва илди арзес кумекбарни. Цаибил илгъуна балбуц бетерхур ГIяхIкент шила шантачил.

Балбуцличир бутIакьяндеш дариб ДР-ла Халкьла Собраниела депутат М.ХалалмяхIяммадовли, Лавашала районна бекIла заместительтани, Лавашала районна шайчивси Россияла ОМВД-ла начальник С.РяхIимовли, Лавашала районна имам Ш.БяхIяндгIялиевли, социальный ва газанала къуллукъунала, районна хутIла кабизунала вакилтани ва цархIилтанира.
ГIяхIкент шила бекI М.Уллубиевли имцIаливан пикри бяхIчиаэсти масъулти гьаладихьиб ва илди арзес багьандан районна администрациялира республикала кабизунанира гIеббуцес гIягIниси биъни багьахъур.
Чараагарли арзес хIяжатти масъулти ахъдуциб шила шантанира. Илди сари: дурхIнала анхъ абхьни, гьундури къулайдарни, школализиб хурегуни дируси хъали тIашбатни, газ хIебиъни, хутI билшни ва цархIилтира.
Шантала лерилра масъулти гIямрулизир детерхахъес пикрилизи касиб.
ЦабутIаван, арбякьунси дуслизиб Лаваша-Буйнакъск хан гьуни байхъу-хъяшли къулайбарниличила ва хутIла тIулри дарсдарниличилара гьанбушиб. Ш.Дабишевли буриб «100 школа» программализи пищеблок тIашбалтнила масъала каберхахъес имканбикIур. Илкьяйдали 2020-ибил дуслис дурхIнала анхъ абхьес ва спортзал хIяжатти ваяхIличил гIеббуцес пикрибарили саби.
М.ХалалмяхIяммадовли гьундури къулайдирнила ши хутIличил гIеббурцнила шайчиб кумекбарес чеасиб.
Балбуцла ахирличиб Ш.Дабишевли буриб шила челукьути лерилра масъулти сунела хIерудилиур дирар или.