Даргантас даргала мез ва дин дегIлара дурхъати сари. Илди лерихIи урдабяхъибти адамтачиб пахру хIебарес хIейрар. Пахрубареси адам сари даргала мезла «Замана» ва «Ас-Салам» газетабазир рузуси хIямшиман Наида Гъуруева.

Иличил наб бузериличил дархдасунти суалти хIя­сиб­ли чуйнара къаршиикес кьадарбиуб. Ва, гьар­­хIели Наидала мал­хIямдешли ва ка­гибдешли та­ма­ша­ви­рахъаси. Ва гIур, набзи нуни ираси, «ХIя­­лалдиаб, хIям­­­ши­ман рурсилис, ша­гьарлизир хIе­ри­рули хьал­ли, ши­ла шантала гIядатуни хъум­хIер­турли са­бур­­личил ру­­зуси. Ил­дигъунтани саби дарга чихъ-чебяхI­ба­­риб­си».
«Замана» газета бучIантани дучIули дургар Наидала белкIани. Саркъибти макьалабани даргантачи диги, илдала баркьудлумачи хIеруди чедиахъули сари. Дигеси саби Н.Гъуруевани нушаб бахълис ашкарли ахIенти тарихла бяхIяни гьаргдирни. Илдигъун­тазибад ца саби дин багьандан Екатеринани дарибти цацадехI хIянчурбачила буруси белкIра. Ил леб газетала 5-ибил номерлизиб.
Дахъал сари Наидала белкIани. ДучIеная илди ва чедиидая хIямшиман рурсила динра Даргара дурхъади­рути пикруми.
Паргъатси, кагибси дубурлан хьунул адамла гIиб­ратла баркьудлуми хьулчилидуцили, назмула иш­ди тугъи багъишладирулра Наида Гъуруевас:
Шира шила шантира
Дай уркIилар дихуси,
Даргара даргантира
ЧебяхIли чебиуси.

Дин дарман балли балгни
Икрамтачил дируси,
Сабурла ванзаличир
Кагили хIеррируси.
Чисалра цалисалра
КIибяхIяндеш хIейруси,
КIиуркIдешла лишанти
Мякьла гъамхIедарибси.

ХIямшимантала амру
Ахъбуцили бихуси,
Бахълис гIибратла нурван
Алки шаларикIуси.