ЗАМАНА - Гьундурачив мяхӀкамли вирен!

Гьундурачи дурабухъалли, бусягӀятал гӀягӀниси мерла баэс къалабали саби. Сецад вайти анцӀбукьуни детарахъулил ил­дигъунтала баркьудлумани. ХӀера, гьар баз гьундурачир кадикибти бехIемцIунала, ил лугIилизиб – илдазиб алхунти адамталара кьадар че­биулрагу нушани. Сен, гьатIи, илцад вайти анцӀ­бу­кьуни кадиркути?

Дила пикрили, машина бикес ихтиярбируси документ иснилизиб бургар. Ил документ автошкола белчӀи, инструкторличил варх машина бикес ункъли бурсивиубли гӀергъи, бедлугес гӀягӀниси саби. Амма гьанна имцӀатигъунтани ил, арц дедили, исули саби, бекIлизир биалли, гьунчивад вархьли вашнила черкадти багьудлуми агара. Арц дедили, имтихIянтира дедлугули сари, ва бурсидеш агарли, машина бикес ихтияр кайсули саби.
ЦацабехIти бегIтани, урши 18 дус виубхӀели, савгъат кьяйда илгъуна ихтияр пешкешбирули саби. ИлхIели сейкIуси?! Илцадра пикри агара цацабехӀти адамтала. Машиналичив дуравхъунхӀели, гьундурачир хӀечи хъарти жавабкардеш лерниличила пикрира биэс гӀягӀнисигу. ИлхIелира хӀела гӀямрулисцун ахӀенну, хӀечил барх машинала бухIнабталара гӀямрулис жавабкардеш дихес чебиркур. Селис гӀягӀниси машина бикнилис ихтияр, ил бикес хӀебалули виалли?
Илала дурабадра, бегӀлара дукелцӀила анцIбукьли бетарули саби бахъал жагьилти автошколализи букьес урузкIни. Рахли чи-биалра ила учӀес керхалли, дукелцIиличи ирхьули сай. Сен? Бахълис адамли акӀубхIейчибад машина бикес балуси саби или гьанбиркули бургар. Амма илкьяйда ахӀен. Илкьяйда биалри, гьундурачир илцад дахъал бехӀемцӀуни кахIедирки.
ЦацабехӀти бикӀар: «Машина бикес асубируси ихтияр вегӀла цIакьаначил сеннира касес хӀейрар, арц дедес чебиркур. ЦархIил тяхIярли хӀелуга». Илдигъунтази чIумали бурес вирус – гьаланачи хIушани къайгъибарая, гIур чебиидая секьяйдали вегIла багьудлумачил ил касес вирусил.
ХӀера, нуни ца-чумал жумягӀ гьалаб касира ил ихтияр (водительские права). Наб чисалра арц дедес гӀягӀнихӀебикиб. Нуни инструкторлис, машина бикахъес чеимцIали бурсиварахъес багьандан, арц дедира. Се къияндеш леба, гьатӀи, илаб? Селра агара. Циила къайгъибарили, гӀур вегIличирти жавабкардешличила пикриухъи, ихтияр касалли, бегӀлара гӀяхӀси саби.
ХIурматла дарганти, гьундурачир мяхIкамли диреная!

 

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na fotoФотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-78978 от 20 августа 2020 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 66-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
fa  in  ok  vk  yt  rss
Top