ЗАМАНА - «Диги адикьни — нушала чебла»
«Диги адикьни —  нушала чебла»

ДАССР акIахъубла 100 дус дик­ни­лис хасдарибти дал­ду­цуни гIям­­рулизир дурадуркIнила да­зур­­базиб «Кайтаги» этноцентрла спе­­циа­лис­­тунани «ГIинизла мякьлаб рурсби» ва «Хай­дакьлизиб мекъ» бикIути гIя­да­ту­на­ла тя­хIяр-кьяйда чедиахъути, дал­дуцуни ду­ра­деркIиб. Илар Мажалисла культурала цент­р­ла гIяртистунанира бутIа­кьян­деш да­риб.

Далдуцуни этноцентрла азбарлизир детерхур. Мекъла гIядат чебаахъес хIядурбикIухIели, «Кайтаги» центрла директор З.ХIясановани, адамла гIямрулизиб магьар дихьни мягIничебси анцIбукь биъниличила буриб. Ил жявхIелла гIя­датуназибадли ца саби, суненира жагьси хъалибарг алкIнилис бикьридеш дируси.
«ИшбархIи нушани хайдакьлантала мекъла жагаси гIядат чебиахъехIе. ЦIикури гьунирралтни – дебали мягIничебси анцI­­букь саби. Гьалабла гIядат хIясибли, цIи­ку­рила гьалмагъ рурсбани илис нешли бе­дибси мас бучили, уркураличи кабихьили, цIикурира каратурли, тухумтачил рарх гелешмешла юртлизи аркуси сари. ЦIи­курилис гелешмешла неш къапула гьалар гьунириуси сари ва иличи кампетуни, хиви, къурушми яра биринж иргьути сари. КIи­найс, гIяхIдешуни дулгули, цIикурила гьалмагъ рурсбани цIикурилис бедибси мас гелешмешла хъули архуси саби. ГIядат хIя­сибли, юртла унабурхIличиб гелешмешла нешли цIикурила бекIла чедиб кьацI бутI­надбарили, жагьилтас хъулиб баракат, ди­ги, кьабулдеш диубли дигни иргъахъу», — ри­кIи З.ХIясанова.
КIинайс, миллатла палтарличил бегI­биубти культурала центрла хIянчи­зар­тани, музыкала ваяхIличир жагати агурби зайдухъахъи, цIикури гелешмешла юртлизи аркнила гIядат дурусли чебаахъиб.
Ил бархIи «ГIинизла мякьлаб рурсби» би­кIуси сценкара гьалабихьиб. Хайдакьла рурсби миллатла жагати палтарличил бегI­биуб­ли, гIинизларад умути шараб-шинни гажинти дицIили, чула гьалмагъ рурсила мекъличила гъайбикIули, аркьулри.
Хайдакьла районна бекI ГI.Темир­бу­ла­товла гъай хIясибли, илдигъунти далдуцуни дурадуркIнили хала бегIтала гIямру-яшавличила иргъахъули саби.
«ВегI­ла халкьла урхIмешуахIенти далай-делхъ ва гIядатуни мяхIкамдарни дебали мягI­ни­чеб­си саби. БусягIятла манзил, чеал­кIуси нас­лулизир адабдешла чихъти къи­ли­къуни адилкьни чараагарсили бетарули са­би. Къа­лабали гьалабяхI башуси манзиллизиб жагьилти миллатла культураличи ва вегIла халкьла гIядатуначи дигичебтили абикьес чебси саби», — викIи ил.

 

О нас

ЗАМАНА . 0+. Учредитель: ГБУ РД ''Редакция республиканской газеты ''Замана''. Главный редактор: 
 
logo na fotoФотографии с маркировкой
взяты из открытых источников
 

СМИ

Сайт “Замана” (www.zamana.info), зарегистрирован Федеральной службой по надзору в сфере связи , информационных технологий и массовых коммуникаций . Свидетельство о регистрации средства массовой информации Эл № ФС77-78978 от 20 августа 2020 года..

Контакты

Адрес редакции: 367018, Республика Дагестан, г. Махачкала, пр-т Насрутдинова 1А.
Тел: 66-00-25.  E-mail: Этот адрес электронной почты защищён от спам-ботов. У вас должен быть включен JavaScript для просмотра.
 
fa  in  ok  vk  yt  rss
Top