Ишди бурхIназив ду­нъя­­личив бегI­лара им­цIали гьа­нур­­­шу­си адам, да­гъис­тан­лан ва рос­сия­лан ХIя­биб Нур­мя­хIям­мадов сайри ви­кIас­лира, ха­­тIа­­хIеркус. Ил­ван хъярхъли сунени пик­­­ри­ба­­рибси бетурхахъули, спорт­­ла ахъанай­тачи ваибси, чина­вал­ра цархIил чил­­ра агарси сай.

Цацали бирхI­­нила гъудурти журабала шайчивси ду­нъяла чемпион ХIябиб НурмяхIяммадов октябрьла 24-личив Абу-Дабилизив (ОАЭ) хIяйна UFC-ла (бир­хIу­­тала таманси чемпионатла) ири бихан ветаур. БегI гьалав – 2018 ибил дуслизив Конор Макгрегорличивад чедивикили, кIинайс – 2019 ибил дуслизив Дастин Порьеличивад, ва гьанна – Джастин Гэтжиличивад.
ХIябибла че у «ЧIака» саби. Ил чисалра удихIейкибси абз­ла гьавкьяна сай. 16-йна че­­дивикайчи ил вирхIусири ну­­шала улкализив, спортла ММА-ла журализив, гIур – Америкализив UFC-лизив. Илар илини гьаб-гIергъили 13-йна чедибдеш сархиб. Гъудурти журабала абзаназив вирхIес гьалар илини сар­хибтири дзюдола цIудара ири, самбола, панкратионна ва гIяр­мияла някъ-някъли вирхI­ни­ла халкьани-ургабси спортла мастерла уми.
ХIябиб мушулвашес ва вир­хIес ве­хIи­хьибсири сунела дуд­еш, дунъяличирра ха­бардерхурси ГIябдулманап Нур­мя­хIям­мадовла спортла зал­лизив (Ишдусла июльла 3-личив, сунела гIяпабаркь, коронавирус­ла чейхъуси изайзивад вебкIиб, ва илала беб­кIа ХIябиблис бегIлара халаси бетахърили уббухъун). ХIябалра сунечил бирхIути бегI­ла гIер­гъи­ти абзла гьабкьянабачивад ХIябиб гIяндуршнила тяхIяр-кьяйда пай­дала­дар­ни­ли­чивли че­дивикибси сай. Октябрьла 24-личив Джастин Гэтжиличил вирхI­­нилис ХIябиблис UFC-ли 6 мил­лион дол­лар дедили сари, би­кIар, илдала чеди – Дэйна Уайтли 50 азир долларла бонусра (премия). Джастин Гэтжиличивад ХIябиб кIиэ­сил бутIализив (раундлизив) чедивикиб.
Абзла ахирличиб илини лебтасалра – UFC-лис ва илала президент Дэйна Уайт­лис, Америкализивси сунела тренер Хавьер Мердеслис ва командалис, сунечил вирхIуси Жастин Гэтжилис бархли – баркалла багьахъур. Илаб илини бу­риб 29 ибил вирхIнила абз сунела гIям­рулизиб бегIла гIергъиси сабри или. «Нуни иличирли дила спортла шайчирти абзани тIашиулра, — викIи ХIябиб. – Ил барес нешлизи гъай бедибсири. Илис ну къянахIейрус».
32 дус виубси дунъяличив бегIлара машгьурси спортсмен, 29-йна чедивикили ва чисалра цайналра удихIейкили, асилдешла ахъанайтачи ваили, спорт­лизивад арякьун. Илала спортлизибси чебяхIси чедибдеш халкьли хъумхIерту ва чула уркI­базиб бихIу. Ил чеалкIути нас­лубасра гIяхIси гIибратра сай.
ХIябиб чедивикибхIели, Дагъиста ва Северный Кавказла шагьуртазир бахъал адамтани делхъличил ва далуйтачил байрумти дурадеркIиб. Ит дуги, чула ургав ХIябиб чедивиркниличи ташмишвикIуси агаркъира, лебилра дагъистанланти телевизортала гьала кабиили, хIерлири. Амма илдазивад чилилра балули ахIенри, чула «ЧIака», зягIипликъира, вирхIес кавхъни. UFC-ла президент Дэйна Уайтли бурни хIясибли, ХIябиб, хIябал жумягI гьалар дячунти кIел гумул ва лутIи кьяшла лига изниличи хIерхIеили, абзлизи кавхъи уилри. Баз гьалав ХIябиб, тренерли бурни хIясибли, лихIила мякь бемднила (свинка) изайзи викили уилри. «Ил са­бабли ХIябиблис сентябрьличир кIел жу­мягIлис тренировкаби дархьдатес чебуркъуб» — буриб Хавьер Мендесли.
ХIябиб НурмяхIяммадов, Дагъиста ва Россиялацунра ахIи, лебилра дунъяла спортлизи ахъибти адамталара пахру сай. Илис бикьридеш дирули сари ишди бурхIназир телепередачабазир иличила­ дурути гапла гъайлира. Октябрьла 25-ли­чиб бархIехъ телевидениела цаибил каналли ХIябибличила «Асилдешла ахъа­найчив» бикIуси передача чебаахъиб. Россияла Президент В.Путинни ва лебилра дунъяла бегIлара машгьурти спортсментани ХIябиб чедибдешличил мубаракварниличилара буриб.
Октябрьла 24-личиб Абу-Дабилизиб кIел гьатIи рос­сиялан чедибикиб: Александр Волков ва дагъистанлан Мя­хIяммад Анкалаев. М.Анкалаев, ХIя­биб­ван, 50 азир долларла премияличира лайикьикиб.