Даргала рухIласи анкъили бетаурси «Замана» газетала редакциялизиб гьанна сабухъчебли бузули жагьил журналистуни леб. Дахъал дусмазиб даргала журналистикализи мекелли халаси пай кабихьибти машгьурти лукIантала давлачерти устадеш гIерасили, чучи хъарси бирули саби илданира.
Газетала бекI редактор Юсупов Арсен ГъазимяхIяммадовичра бархкьяби ункъли гIеббурцуси ва руководительла къуллукъуни дузахъес гIяхIил бажардииркуси сай. Халадеш-хамдеш агарси жагьил бекI редакторлира журналистунала санигIятлашалти устадеш ахъдуцахъесра къайгъни дакIудирули вирар, газетала бухIнабуц мягIничебсили биахъесли бузахъес хIянчизарти жибиру.
Къиян агарли, дахъал арц касес жагьилти хьулбикIуси, иш илцадра-декIар гьамадли ахIенси манзиллизиб редакциялизиб чекабизурли бузутала къяяназирадси сари корреспондент Наида Гъуруева. Ил барх бузутачил къугъали ралкарикибси, сунечи хъарси жавабкардешличил таманбируси, пагьмучерси журналистка сари. Илини даргала мезличил дурабулхъуси «Ас-Салам» газетала редактор сарливанра, динна масъултачил дубурланти тянишбирули, халаси хIянчи дурабуркIули рирар.
Сунела санигIятлашалти устадеш ахъдуцес ва республикала журналистуни-ургар дурадуркIути конкурсуназир бутIакьяндеш диресра ил бажардириркули сари. ХIера, гьалабванра илини Дагъиста миллатуни-ургарти бархбасунала дазурби дягIудикIахънила шайчиб СМИ-бала ургаб дурабуркIуси конкурсличи макьала гьалабихьибсири. Наида III-ибил даражала дипломличи лайикьрикиб.
Наида Гъуруевани белкIунси «ДигIяндешуни дагьурси» ибси макьалалис сабри республикала миллатла политикала ва динна къуллукъунала шайчибси Министерстволи илгъуна кьимат бедибси.
Н.Гъуруевани ДГУ-ла филологияла факультетла журналистикала отделение таманаибси сари. Рузули калун ил мугIяллимлира. ИлхIели илини «Юнкор» бикIуси кружок акIахъубсири ва, дурхIнанира илар жигарла бутIакьяндеш дирутири. Н.Гъуруевани бучIахъути дурхIнала макьалаби мурталра дурхIнас хасдарибти журналтазир ва газетабазир дурадулхъутири. Школализир рузухIелира, илини «Замана» газетализи макьалаби лукIес замана бургусири.
«Замана» газетала агьлули илгъуна чедибдешличил нушала Наида уркIи-уркIиларад мубаракрирули, гьаннала гIергъира творчестволизир гьарбизуни дулгули сари. Арати ва талихIчерти гIямру хIед, хIурматла Наида!
