Жузани, журналтани гьарил пагьмучевси адамла гIям­рулизиб мекелли халаси ва мягIничебси мер бур­цуси саби. Гьа­рил сагали дурабухъунси жуз биал­ли, па­сихI­картани халаси иштяхIличил ва ур­­кIи­ла дигиличил кьабулбиру.

ХIера, гьалабванра ­Хайдайкьла районнизибси «Кайтаги» бикIуси куль­турала Центрлизиб гьарахъ­ла­бад буз­нила тяхIярла кумекличил «Хай­дакьл­а урунжуни» бикIуси литературала цала­бяхъла­ бу­тIа­кьян­чи ПатIимат Мирзаевала «Дарша — дила дигира децIра» бикIуси жузличил бучIанти тяниш­бариб.
Балбуц абхьиб баягъи ил цалабяхъла руко­во­дитель Зубайдат ХIясановани: «Сагаси жуз дурабухъни поэтлис ва писательлис дебали мягIничебси анцIбукьли бетаруси саби. Гьар дус нушала литературала цалабяхъ сагати умачил, бутIакьянчибачил чебирцIули саби, чулира дигалли урус мезли, дигалли дарган мезли поэзия ва проза лукIути, саркъибти произведениеби гьаладирхьути, ил шайчир устадеш чедиахъути. Ил дебали дигесира саби, сенахIенну илдала кумекличибли культура мяхIкамбарес ва гьалабяхI башахъес имканбикIули саби. ВатIайчи, акIубти мер-мусаличи бучIантала диги имцIадикIулира чедиулра. УркIи-уркIиларад мубаракрирулри, хIурматла ПатIимат Мирзаева, хIела гIямрулизиб илгъуна разиси анцIбукь кабикниличил», — рикIи Зубайдат ХIясанова.
«Дарша — дила дигира децIра» жузла автор П.Мирзаевани ВатIайчи халати диги сипатдирули сари. Сунела ши Хайдакьла карталичибад беткахъниличира цIумрикIули, цархIилти дагъистанланталайчи мешуси уркIила децI, пашмандеш ил жузлизир чедиахъули сари.
Жуз хасбарибси саби жявхIелила культуралис, беткахъибси шила гьар-урла гIядатунас, шилизибад дурабухъунти, чула мез ва тIабигIят дурхIназира дагьахъес къайгъилизибти адамтас.
«Карталичир чехIедаахъибти дахъал хIеруди агарли, лайкадакIибти шими лер. Багьла-багьлали адамтани илдачила хъумуртули саби. Ну акIубси шиличила хъумхIертахъес багьандан, белкIунси саби нуни иш жуз. Илизир учIаннис гьаладирхьулра нушала гIядатуни, рухIла культура, илаб хIербирули калунти адамтала гIяхIялдеш, уржибдеш ва цаличи цала диги. Дила халкьла гIяхIти баркьудлуми хъумхIертурли, чеабиуси наслулира дагьурли, дигулра наб. Кьисматли гIямрулизив чина укалра адам, сай акIубси шила мер селилра ва чилилра чебицIахъес вируси ахIен», —рикIи П.Мирзаева, сунела хIялани дигIянхIедирули.
Хайдакьла районна бекI ГIялим Темирбулатовли Хайдакьла мез, культура, тарих калахъес гьар бархIи чекабизурли бузути поэтуни-писательтала мекелли халаси пайличила гьанбушиб.
«Тарихла шайчибси хIянчи гьар-урла анцIбукьуни дяркънилизи халбарес вирар. Ил хIянчи дурабуркIуси саби халаси гъазаличил, декIар-декIарти хIялумцI­лабачи хъарихъули. Илкьяйда ПатIимат Мирзаеванира Даршала шила тарих, культура чедетаахъили хIердарили, жузлизир сипатдарили сари. Мубаракрарес дигулра ПатIимат илгъуна мягIничебси жуз дураъниличил, ва челябкьлализир­ра илис гьарбизуницун дулгулра».
ПикридухъахIелли, гьарли-марли, жузла автор децI­­рикIусигъуна анцIбукь саби. Сецад шими дацIка­дулхъули нушала Дагъистайзир. Адамти шагьуртази геч­бирули саби, чула мез, культура, гIядатуни бахъли ду­захъули ахIен, литературара мухIлила пагьмура дуб-дубли хъумуртули сари. Иличирли багьла-багьлали дет­кайхъули сари арагIер шимира. Илкьяйда бетаахъес асу­хIебирар. Гьарил милллатла адамтани кьасбарес гIягI­ниси саби анцIбукь илгъуна агиличи бетхIебикахъес.
Балулра, хъалибаргра хIербарили, яшавла се­гъунтилра шуртIри агарси шилизив хIериэс гьа­мад­ли ахIен. Адамтас хIянчила мерани агара. Им­цIа­­ливан, ил сабабли саби жагьилти шагьуртази гечбирути. Нушала хIу­ку­мат­ла хIянчизартани илди масъултачи кьанни яра жявли пикри бяхIчииъниличи рирхулра. Гьачам беткахъахъибси секIал, гIелабяхIли чарбарес дебали къиянни бирар. Пикридухъеная, ахIерти дарганти! МяхIкамдарая дурхъати мез, ахIерти мер-муса ва давлачебси тарих!