Багьла-багьлали байхъала дусцадхIи гьанкӀ ахъили, дунъя ми­цӀир­бирули саби. Илцадра халаси замана я гӀядатла гӀямрули хӀер­кайэс, я вегӀла пикруми ва кьасани детерхахъес имкан агарлири.

Ну пикриикӀулра гьанна сецад дарсдарибал нушала гӀямру сагали дакIубиубси, коронавирусла чейхъуси изай. Секьяйда аркьусири ишдус, ил балагь хӀебакӀибси биалри? Сен-биалра, гьанна лебси агиличил баришкадиубли, хӀер­ка­ди­­рес чевкъули саби. Чедиулра, школабира гьаргдирули сари. Циила тамашаласи жураличил ибхьули сари илди. ДекӀар-декӀарти шко­лабазир ва уни­верситетуназир цаэсил жумягӀлизир дистанционный тяхIярли ба­гьудлуми кайсахъули сари, нушаб сецад ил бетуц хIейгули ди­ахIелра. Пикруми арда­шули сари гьанна коронавирусла чейхъуси изай хъумартахъурти масъултачи. ГӀяхӀил пикриухъалли, аргъесли саби: сецад балагь ба­кӀал­ра, ил балагьличибси давлачеббирутира бирар. Набзи ца адамли буриливан, гьанна «давлачебти, гьатӀира давлачеббируси, мис­кинти биалли, мис­кин­бируси замана саби». Марлира, карантинна за­мана ил де­кӀардеш, гьатӀира имцӀабиуб. БегӀлара децIигуси: илдала давла, нушала ванзала ва адамтала сурсатуни пайдаладарили, им­­цӀа­бир­ни.
Мисаллис, нуни чуйнара пикри бяхӀчиаибсири МяхӀячкъалала машгьурси Ак-гёль шараличи. БекӀлил гӀягӀнили ахӀен чизи-биалра хьарбаэс, секьяйда сабрил илала аги 10, 20, 30 дус гьалаб. Нуни гьар бархӀи, хIянчила вашухӀели, сен-сен ил барсбирулил чебиулра.
Ца дус гьалаб ну тамашавиубра шарала шин гIяхIцадла кам­ди­уб­хIели, алавчарти мер-муса дерублири, ванза дегъбиубхӀели. Амма дила разидешлис ахир аги Ак-гёль гӀурра бягӀубиубхIели, ва чумал жумягӀ дикибхӀели, ил нуни балуси жураличиб сабри. Ишдус гьатӀира де­цӀагиб, чумал базла карантинна гӀергъи, ил че­ба­ибхIели. Ну дус гьа­лав вякьунхIели, берубли хIясиббарибси мер гьан­­на, гьатӀира им­цӀа­ли берублири ва духъутIкадиубти хъалта-кьар­ли буцилри. Селичила иргъахъули ил анцӀбукьли? Ила­бад аргъесли саби: ишдус иларти шин камдиуб, амма гӀур ша­ра бягӀухӀебиуб. Ам­ма шара-алав хъулри ва адамтала кисназир арц имцIадирахъути цар­хӀилти мерани дахъдаиб.
Гьайгьайрагу, децӀигахъули саби ил баркьудили, амма ца адамли селра барес хӀейрар. Ак-гёльличил бархбасунси дебали къиянси масъала саби. Илдигъунти аргъбаибти, челукьути масъулти нушала рес­пуб­ли­кализир дахъал лер. ТамашахIейэси анцIбукь ахIен, сенахӀенну халкь пикрихӀебарили, ахърила бегIти чус дигутани биркьули саби. Чи­на хӀербикӀули хӀукумат? Сен адамти лехӀкахъили? Суалти дахъал сари, жавабти агара.