Туризм кьалли гьалабяхI башули саби…

Туризм гьалабяхI башахъни ну­ша­ла республикалис дебали мягI­ни­чебси саби. Ил кьяли гьалабяхI ба­шахъес, нушала гIяхIцад имкантира лер: урхьу, дубурти, къадурби, жявхIелила памятникуни…

Кавказла цархIилти регионталайчир, Дагъиста тIабигIят ва мер-муса жагати сари дикIахIеллира, хатIахIедиркехIе, дила пикрили. Масала, Грузиялизиб туризм жявлил гьалабяхI арбякьи саби. Википедияла (Интернетлизибси энциклопедия) баянти хIясибли, 2016 ибил дуслизиб Грузияли 6 миллионничибра имцIали дурала улкнала туристуни кьабулбарили саби.
Дагъистайзиб биалли, ил кьяли бузахъес диргаладулхъути цацадехIти масъулти лерри (экстремизмала ва терроризмала хIиллабани урехи алкIахънила). Гьанна биалли республикализиб аги паргъатси саби, республикала гражданинтала ва гIяхIлала гIямрулис урехи алкIахъуси селра агара (Лебил дунъяличибра тIинтIбиубси коронавирусла чейхъуси изай алкIахъуси урехи ахIенси).
Дагъистайзиб бархIиличиб-бархIи туристунала лугIи ахъбикIули саби. ГIяхIлани имцIали чеббиркIуси мерли бетаурли саби Казбековла районнизибси Сулахъ хIеркIла мурхьси къада ва ил хIеркIличирти ЧIиркейла, Миатлила ГЭС-ани.
Ишди бурхIназиб «Дагъистан» РИА-ла ре­дакцияли бучибси пресс-конферен­ция­­личиб Миатлила ГЭС-ла мер-мусаличир туристунала ма­­шинаби дет-саддашахънила хIекь­­лизибси масъала хIер­бариб.
Балбуцличиб гъайбухъун ДР-ла туризмала ва халкьла художестволаси бузерила шайчивси министр Расул Ибрагьимов, «РусГидро» ПАО-ла Дагъиста филиалла директор Тимур ХIямзатов, ДР-ла транспортла ва гьундурала хозяйствола шайчивси министрла заместитель МяхIяммад ТIагьиров ва цацадехIти ведомствобала вакилтира.
«РусГидро» ПАО-ла Дагъиста филиалла директорла гъай хIясибли, жявхIелила Зубутли аркьуси гьуни 1989 ибил дуслизиб, лебил ши диркьаличи гечбарили гIергъи, шилизиб калунти ца-хIябал хозяйствола тилади хIясибли, тIашбатурсири. Ил гьуни сунела даража хIясибли лугIилашал дахъал машинабас хасбарибси ахIенри. Гьанна илдала лугIи ца бархIила бухIнаб 600-личи абиркули саби, ва илгъуна аги барсхIебарили батес сеннира асухIебирар.
Станцияла мер-мусаличир машинабала лугIи камкабиахъес багьандан, «РусГидрола» директорли туристуни турагентствобала диштIати автобусуначибцун бет-садбашахъес маслигIятбариб, саби-бегIти автомашинабачиб бакIибти туристуни булан.
ДР-ла туризмала ва халкьла художестволаси бузерила шайчивси министрли бурни хIя­сибли, ведомстволи халаси хIянчи дураберкIили саби, Сулахъ хIеркIла мурхьси къадала жагадеш туристунази чебаахъес багьандан. ИшбархIи Сулахъ хIеркI республикала бегI­лара жагатигъунти мераназибадли ца саби, сабира туристунани имцIаливан чеб­бир­кIуси. Илис бикьридеш дирули сари ила дашути машинабала лугIи халабикIнили. Амма иличибли, хIейгеси биалра, Миатлила ГЭС-ла машинаби хIя­сибдируси пунктличир къияндешуни алкIули сари.
«Республикализиб туризм гьа­лабяхI башахъес нуша къайгъилизи диркули хьаллира, адамтас урехи хIебирахънила масъала бекI­либиубсигъунали кавлули са­би. Ил багьандан, гьар секIал пик­­­ридарили, гьунила масъала бекI­­барес гIягIнили саби, Зубут­лила шантала ихтиюртира хIе­дуи, Дагъиста «РусГидрола» уре­хи хIебирахънила шайчирти тIа­лабунира детерхахъесли», — викIи Р. Ибрагьимов.
Илкьяйда балбуцличиб гьан­бушиб, Сулахъ хIеркI­ли­чиб шинна транспортличил ту­­ристуни урехиагарли пай­да­ла­­бикIахъес багьандан, МЧС-ла ва Ространснадзорла хIеруди им­цIабарес гIягIнили биъниличилара.
Туризм кьалли гьалабяхI ба­шули саби, жамигIятла гIям­ру­ла шуртIри, хаслира гьундури, ункъдаралри.