Бархбасуни уржахъуси

«Ца адамли шила багьа буэс­ра ви­рар, илала кьад­ри-кьи­мат ахъдуцесра ви­рар» ибси бу­­­­­­рала лебси саби ду­бурлантала. Ил­кьяй­да­ли абзурли шимира лер, вегIла рес­пуб­­ли­ка­ла­­цунра ахIи, улкалара багьа ва хIур­мат ахъ­дур­­цу­ти.

Илгъуна кьиматличи лайикьси саби Дагъиста ванзаличиб жавгьар духуриван даршани дусмазиб, цархIилти шимазибадли декIарбухъунси Кубачила ши. Ил шила пагьмучебти устнани саби Кубачи ахIенну, Дагъистанра дунъяличиб машгьурсили бетаахъурси. Совет хIукуматла замана Кубачила художественный комбинатлизиб, лебилра гIярбукIантицунра ахIи, алавти шимазибадтира бахъал адамти бузутири ва комбинатла 3-4 дерхIличир цалра хъали бацIли хIебири. Илди мургьи-арцла устнала бузерила макьамтани зайдикIахъули дири. Адам гIяшикьвирахъути мургьи-арцла, мелхиорла ва цархIилти дурхъати журала мегьлизирад дарибти ваяхI илцадра дахъал дири, илди дунъяла чумра улкализи диути сари или бурусири итхIели комбинатла директорли узуси Юсуп ГIяхIмадовли. Ил дебали чеветаибси ва халаси хIурматличил пайдалавикIуси руководительла машгьурти уст­нала бузери къелгIеббикесра халати ус­та­деш лертири.
Дигеси саби, ишбархIира гIярбукIан­та­л­а бузери ахъли кьиматлабирути далдуцу­ни ду­­­­ра­­дуркIни. Бархьси саби, гIер­гъи­ти дус­мазир улкализир кадикибти дарсдешу­нани ха­барла Кубачила комбинатличира асар­хIе­барили кахIелун, ва бахъал гIяр­бу­кIан­ти бузес имканти агарли калун. ГIер­гъиси замана багьла-багьлали куба­чи­лантала минала санигIят ми­цIир­сабирули саби.
Илдала бузери ахъли кьиматлабирнилис бикьрили бетаур гьалабван Дахадаевла район­на Кубачила шилизиб халкьани-ургабси печатная гра­фикала «Кубачила къала» ибси кIиибил Биеннале дура­беркI­нира. Ил балбуцличи гьаладихьили сари 126 художник-графикла ва художественный вузанала студентунала 200-личирра имцIали хIянчи. Илди сари вецIани улкнала: Россияла, Белоруссияла, Украинала, Болгарияла, Чехияла, Турцияла, Германияла, Нидерландунала, Мексикала ва Венесуэллала.
Балбуц шадлихъла аги-хIяйзиб ибхьу­хIе­ли, илаб лебри Дагъиста шагьуртазир детер­хурти выставкабала бутIакьян­чиби, Мя­­хIяч­къа­лализибадти гIяхIли ва Куба­чила шила жамигIят. Биен­налела куратор, искусствоведунала ассоциацияла член Е.Дидковскаяни ва проектла ху­дожественный руководитель, Дагъиста халкьла художник Ю.Хан­мяхIям­ма­довли цала­би­киб­­т­ас выставкаличила баянти гьа­ла­дихьиб.
«2020-ибил дусла биен­на­лела программала конкурслизи гьаладихьили сари де­­­кIар-декIарти улкнала жагьилти ва маш­гьур­­­биубти худо­ж­­никунала хIянчурби. Ил­да­­зи­бад­ли байхъай бегI гьалар са­ри бу­тIа­кьяндеш дирути. БахъхIила хабарла къа­лала авалра дерхIличир мерладарили сари пейзажуни, суратуни, иллюстрацияби ва цархIил журала суратуни, сарира печатная графикала — офорт, линогравюра, ксилография, литог­ра­фия ибти бяхIчибизуни хIясибли далкьаахъурти. Лер конкурсличи гьаладихьибти цар­хIилти хIян­чурбира», — буриб Е.Дид­ковс­кая­ни.
Выставкализир бутIакьян­деш дарибти Хай­дакьла районна хайдакьла някьишла бу­­рибти устни Р.МяхIяммадовани, А.ГIя­ма­ровани, художникуни Б.Расуловани, К.За­­гьи­ровани, халкьла музыкала ваяхI ди­ран М.Мя­хIям­мадовли ва дурхIнала-гIу­лу­хъабала видеотворческая студияла блогертани чула хIянчурби гьаладихьиб. Илдани тIашбатурси къушлизир чула хабарла устнани дарибти хайдакьла някьишличилти чIянкIи, суратуни ва гьаларла ярагъ гьаладихьиб.
Разият МяхIяммадовани ва Анна ГIя­ма­­­ровани хайдакьла ня­кьиш дирнила ус­та­­деш­ла дурс­ри дурадеркIиб. Зай­ду­хъун хакьла музыкала жагати ма­кьам­тира.
Хайдакьла районна бекI ГI.Темир­бу­ла­товли выставка дураберкIибтас ва къу­гъа­ти гIяхIялдеш дарибтас баркалла ба­гьа­хъур.
«Фестивальличир бутIа­кьян­деш дарнили, бегI гьалабси яргализиб, нушала районти-ургар гьалмагъдешла бархбасуни чIу­мадирахъу, пагьмучебти адамтани барсур устадеш гIерису, халкьла культура дав­лачеб­бирар, районтала хIурмат ахъбирар», — буриб ГIялим Темирбулатовли.
Выставка дураберкIибтас ва цалабикиб­тас баркалла багьахъур жамигIятла «Зе­рих­­геран» организацияла вакил Х.Ка­нае­­вани, искусствоведениела доктор М.Мис­­­рихановли, художник А.Сергеевли, ис­­­кус­ствовед В.Бе­са­раб­ли, Дахадаевла районна бекIла заместитель ГI.Жамаловли ва Ку­бачила шила бекI ГI.Куртаевли. Балбуцли­чиб Дагъиста культурала министр З.Бутаевала саламтала кагъарра бел­чIун. Сунела яргализиб Ю.Хан­мя­хIяммадовли гIярбукIантас бар­калла багьахъур балбуц гIеббуцни багьан­дан.
Кубачибси выставка августла ахирличи бикайчи бухъян­билтIуси саби. КIиибил выставка МяхIячкъалала Поэзияла Театрлизиб дурабуркIуси саби.