Дагъиста шими-ша­гьуртазир биштIати-ургар декIар-де­кIарти абзани детурхули ди­рар, хаслира дуцIрумла кани­култала манзил. ХIера, ишди бурхIназибра дурхIнала адаб­ла ва рухIлашалси даража ахъбурцуси, гьар базли дура­буркIуси Хайдакьла рай­он­на ЧIибяхIнила сагаси ми­жит­­­лизиб Кьуръан бучI­ни­ла кон­курс бетерхур. Илар ле­бил­ра дигутани бутIа­кьян­деш дариб ва чула багьудлуми че­даахъиб.

Хайдакьла лерил шимазибад бакIибти уршби-рурсбани Дурхъаси Кьуръа аятуни жагали ва чедетаахъили дучIулри. БутIакьянчиби дусми хIясибли кьукьначи бутIиб ва уршбала 3 кьукьялис мижитла цаибил дерхI­личиб, рурсбала 2 кьукьялис кIиибил дерхIличиб конкурс дураберкIиб.
Мажалис шила бекI­ли­биуб­си мижитла имам Жаб­ра­гIил МяхIяммадовли бурни хIясибли, конкурсла бутIа­кьян­чиби-ургаб халаси абз бетаур, цаличибад ца чедибикес кьасличил. Лебилра уршби ва рурс­би гIяхIил хIядурбиублири ва жагали зайбикIахъули Кьуръан белчIун. «Нушала дурхIни – умуси кагъарла кIапIигъунти са­би, илизи нушани се бел­кIа­хIелра, илдала аргъайзиб кавлуси саби. Ил нушала Идбаг Мя­хIяммадла (с.гI.в.с.) насихIят саби, нушала дурхIнас бяркъ бе­дахъес бурибси, сенкIун илдигъунти бегIти ЧевяхIсини Кьиямала бархIи шабагъатлабирути саби», — викIи ил.
Конкурс бархIи ахъайчи бухъянбитIун ва 10 бутIаличил бетерхур. Гьарил бутIализир сархибти баллани ахирличир цаладяхъиб ва чедибикибти белгибариб.
БегIлара биштIаси, 11 дусла ва иличиб камти гIямрула кьукьялизиб 1-ибил мер сар­хиб Ислам ХIясановли (Жавгъат), мугIяллим – Рабазан ХIяжиибрагьимовли; 2-ибил мер — Муса Мусаевли (ЧIи­бяхI­ни), мугIяллим – Вайсур Мя­хIям­мадов; 3-ибил мер — Сулайбан МяхIяммадовли (Жавгъат), мугIяллим — Ибрагьим ГъазимяхIяммадов.
12-15 дусла гIямрула кьукьялизиб 1-ибил мер сархиб Ражаб МяхIян­д­гIялиевли (Жавгъат), мугIяллим – Рабазан ХIя­жиибрагьимов; 2-ибил мер – МяхIяммад Мур­тузагIялиевли (ХIулли), мугIяллим – Жамбулат МяхIям­мадов; 3-ибил мер – ГIяхI­мад ХIясановли (Жавгъат), мугIяллим – Рабазан ХIяжиибрагьимов.
15 дусличиб халатала кьукьялизиб 1-ибил мер буциб – МяхIяммад Ражабовли (Мажалис), мугIяллим ЗубагIил Мутуков; 2-ибил мер – Рабазан ХIяжимурадовли (Мажалис) му­гIял­лим – ЗубагIил Мутуков; 3-ибил мер – Рабазан Вагьабовли (Жавгъат), мугIяллим – Рабазан ХIяжиибрагьимов.
Илкьяйдали рурсбала 11 дусла кьукьялизибтани 1-ибил мер сархиб Мадина Кьурбановани (ЧIибяхIни); 2-ибил мер — Марьям Кьурбановани (ЧIибяхIни); 3-ибил мер — Кепу Мусаевани ва Милана СултIанмурадовани (Мажалис).
12-15 дусла гIямрула кьукьялизибадтас 1-ибил мер бедиб Аминат Сулайбановас (Мажалис); 2-ибил мер – Пиршереп Мусаевас (Мажалис); 3-ибил мер – ГIяйшат Ражабовас (Жавгъат).
Чедибикибтас арцла шабагъатунира дедиб: 1-ибил мерлис – 3000 къуруш; 2-ибил мерлис – 2000 къуруш; 3-ибил мерлис – 1000 къуруш арцла.
Хайдакьла районна бекI ГIялим Темирбулатовли бурни хIясибли, илдигъунти абзани дурхIни гъирачеббиахъес дебали багалати сари, челябкьлализир гIяхIти устадешличи шурдухъести ва саби мурадуначи баахъести. «ЧеалкIуси наслу дахъал даршдусмазибси исламла культураличил бархбяхъили, гъамли тянишбарили, динна дурхъати кьанунти, Кьуръа аятуни далахъалли, адаб-хIяяла ва рухIлашал дав­ла­чебтили, дагьричебтили бе­тарар. Дурхъаси Кьуръан ва гIяраб мез руркъниличи иш­тяхI имцIабикIни ил дебали ди­геси анцIбукь саби. Баркалла багьахъес дигулра конкурс дураберкIибтас ва дурхIни бяркъурти мугIяллимтас, нушала жагьилти дагьрилашал ва адаблашал гьалабяхI башнилизи буресагарли халаси пай ка­бирхьни багьандан», — викIи районна бекI.
Нушала динна тарих 14 даршдусличибра имцIали би­убси саби ва гьаннара нушала наслула иличи иштяхI им­цIа­би­кIули саби. Дусличи-дус динничи бирхарути, рухIла давла бихIути ва ил мурхьли руркъути, хаслира жагьилти-ургаб имцIабикIни багьандан, уркIи дебали разибирули саби.