БелчIудила дус ахирличи бикайчи нушала улкала ­школаби, коронавирусла чейхъуси изала тIинтIбикIни ­багьандан, ­­дис­танционный тяхIярличи шурдатуртири.

Гьайгьайрагу, ­ил­ди­гъунти тIяхIяр-кьяйда бахълис гIяхIхIедизуртири, ­хаслира ­бучIан­та­ла бегIтас. ЦабехIтала онлайн тяхIярли дурхIни бучIахъес компьютерти аги, цабехIтала телефонти, хIябэстала ­биалли-­иш­тяхI. БегIтачила гъайикIалли, илдазибад бахъла ­даарицад ­багьуд­лу­ми аги чула дурхIнази гIягIниси тяхIярли ­дурсри иргъахъес. Учительтас кьалли, гьарил ученикличил декIарли видео-жаваб­та­чира лехIирхъули, ученикунас кьиматуни ­кадалтес, гьа­тIира къияннири. Гьанна сейкIуси, ил вирусли ­адамтала гьар бар­хIи­­ла гIямрула дахъал хIейгести шалуби гьаргдариб. ­Шко­ла­ба­­ла масъулти лебтасалра якьиндиуб, бегIтани ахирра-ахир ­учи­тельтала къиянси хIянчи кьиматлабариб, бучIес дигути ва ­гъи­ра лебти ученикунани биалли, учитель мякьлав агнила вайдеш ­ар­гъиб.
Амма иличирли вирусличил дархдасунти масъулти таманхIедиуб, ил изай, гьаннара дакIубулхъули, адамтала жан ардихули сари. Иличил барх урехира лебал сагаси белчIудила дуслизибра онлайн тяхIярла багьуди чарбулхъниличи.
МяхIячкъала шагьарличибад 15 километрла гьарахъли мерлабиубли саби Шамхал поселок. Тах шагьарла Кировский районнизи кабурхуси ил шагьарла тяхIярла поселоклизи халбирескабииб 1965 ибил дусличибад. БегI гьалаб илаб хIербирутала кьадар 2-3 азир адам сабри, гьанна илди 12 азирличиб имцIали саби. ИмцIаливан илаб кIарахъанти, къумукъланти, дарганти, булугуни, агъулланти, урусуни ва лезгиби хIербирули саби, камти-биалра лер цархIилти миллатунира.
БелчIудила дус бехIбихьес 20 бархIи лералли, Шамхал поселоклизибси 49 ибил школа Роспотребнадзорли дураберкIибси ахтарди хIясибли, белчIудила дусличи хIядурли ахIен или судли хIукму дурасили саби. Ил анцIбукьли бачабархахъибти ва гъузгъалдибиахъубти жамигIят, учительти ва ученикуни цалабикили кумекбарахъес тиладибикIули саби. Илдани, кьабулагардеш чебаахъили, школала гьалаб митинг дураберкIиб. БакIибти журналистунази илдани бурни хIясибли, Роспотребнадзорли камерабази касибти бегIлара вайти мерани сарри: эскибиубси бурх, хIяжатхана, ва цархIилти. Илкьяйдали школала юрт эскибиубсилизи халбарили, цIализибад мяхIкамдеш бирнила ва санитарный тIалабуначи балхIебикни багьандан школа кьяпIбарес ибси хIукму дурасили саби. Илала мякьлабси поездла гьунира, дурхIнас урехиласи сабливан, школа кьяпIбирнила далиллизи буйгIули саби.
49 ибил школализи башути дурхIнала бегIтани бурни хIясиб­ли, ил школализирти шуртIри гIяхIцадла къулайли сари: илар шин, гьарзати кабинетуни ва спортзал лер, чус гьаладихьибти цархIилти школабазир агарти. Илала дурабад, цархIил школализи шурбаталли, ученикуни хIябал сменализиб бучIес бехIбирхьур ва дурсри гехIел сягIят дикили гIергъи сари тамандирути.
Илдигъунти тяхIяр-кьяйдаличи имцIати бегIтани разиагардеш балахъули саби, сенахIенну шагьарлизи хIянчиличи башути бегIти чула урши-рурсилис гьунибиэс балкьарули ахIен. Илкьяйдали поселоклизибси поездла гьунила итил шайчиб хIербирути дурхIнас цархIил школализи башес багьандан илра байбяхъили, машинала гьунира байбяхъили, хан гьуникад гIяхIцадла гьарахъли башес чевкъули саби.
Митингличи вакIибси Мя­хIяч­къалала багьудила управлениела начальник Вадим Дибияевли буриб: «Нушани хIушаб сагаси школа тIашбатес пикрибарилра, ишабти дурхIни биалли 45, 47 — ибти школабази башесли барибси саби. Илкьяйдали нушани апелляцияла гIярза белкIунра, судла хIукму уббяхъяхъес, яра гIелайзи арбухахъес кьасли.
Судла хIукму гIелайзи ар­бухес бетаалли, яра ил уба­сал­ли, сагаси школа тIашбатайчи хIушала дурхIни иш школализи башес би­рар. БусягIят биалли, гьар се­кIал дигахъути сари судла хIук­мулизирад. Ил барсбарес хIе­биалли, хIушанира ил секIал аргъили дигулра, иша хIушала дурхIни башес асухIебирар, илди башар 45-47-ибти школабази».
ДурхIнала бегIти дугьабизур, сентябрьла 1 сабаайчи ил масъала арзахъес или. Илкьяйда хIебиалли, бегIтани буриливан, дурхIни чула школализи башар.
Гьачамлис адамтала хьул лебал ил масъала гъамси зама­нализиб ирзниличи ва дурхIни чула школализи баш­ниличи.
Сен школа ил даражаличи бикайчи хIеруди агарли ба­турси ва иларти шуртIри ункъ­диахъес ремонт хIеба­риб­си ибси суал биалли, ишбархIи жаваб агарли кавлули саби.