Даргала музыкала-драмала ГI.Ба­ти­райла уличилси театр­­ли Инстаграммла сетьла дар­хьаначирти эфиртазиб чули июль базличиб дура­бер­кIиб­си хIянчи хIясибли хIер­би­кIутачил гIяхIси бархбас бузахъули уббухъун. Гьарил урег-ибил трансляция 200-250 адамли чебаиб.

Илди эфирти Избербашли­зибси Даргала театрла сагаси Юртла жаняхIлизир детерхур­тири. Гьарил эфирлизир хIер­бикIутала гIяртистунас гIяхIдеш дулгути дугьби ва илдази суалти зайдухъун. АхIерти нушала газета бучIанти, хIушани илди нушала «Даргинский музыкально-драматический театр» YouTabe-каналлизир чедаэс дирудая.
«Наб бурес дигулра, къиянси замана культурала ва набчил барх бузути театрла лебилра хIянчизартани дебали урехиласи вирусличи къаршили чузибад лябкьусигъуна бариб. Чула эфиртани илдани компьютерла ва телефонна экрантачи камси заманалис биалра хIербикIути битIакIиб, хIебатур илди кьакьалаб ва цархIилти зягIипбикес бирути мераначиб. Илра пандемияличи къаршиси хIянчи сабри. Баркалла биаб чус», — буриб сунела пикри театрла гIяртист НурбяхIянд Идрисовли.
Арбякьунси жумягIлизир театрлизир гьарли-марти ре­пе­ти­цияби дехIдихьили сари. Ну­шала пикри саби Кь.Ми­гьра­бовла «Сайгид» ва П.Маляревс­кийла «Чудесный клад» пьесаби хIясибли спектакльти кадихьес. ХIер­бикIути театрлизи жиба­рес гIурра урехи лебни багьандан, нушани илди спектакльтира YouTube-каналлизир чедиа­хъе­хIе.
Июльла ахирличив Даргала театрлизи театрла художник ДР-ла халкьла художник Ибрагьимхалил Су­пьянов вакIиб. Илини театр­лизи «Халибарг бехъни» бикIуси Дагъиста халкьла поэт Сулайбан Рабадановла пьеса хIясибли спектакль тIашбатес гIягIнити, хасти ваяхIла ва костюмтала макетуни хиб. Театрла директор МяхIяммад ГIябдулкьадиров, художественный руководитель Мустапа Ибрагьимов, режис­сер-постановщик Рабадан Ильясов ва комедияла игитунала ролани дузахъути гIяртистуни илди хIердарес учибикиб.
Театрла худрукла гъай хIясибли, пьеса «Халибарг бехъни» (цаибил у «Вассалам-Вакалам») гьаннала заманала хIербикIутас сагасили ва мягIничебсили бетарар. Мустапа ГIябдиевичли ил пьеса хIясибли, 20 дус гьалабра спектакль кабихьибсири. Нушани ил дусла ахирличиб сценаличиб гьалабирхьехIе.
ГI.Батирайла уличилси Даргала театрла пресс-служба