Бара гьалабван, «Гьаргси хIукумат» проектла дазурбазиб, «Дагъистан» РИА-лизиб республикала туризмала ва халкьла художестволати ваяхI дирнила шайчивси министр Расул Ибрагьимовла ва СМИ-бала вакилтала гьунибаъни бетерхур.
Балбуц бехIбирхьули, гьаланачиб Р.Ибрагьимовли Дагъистайзир туризмала гIяхIти сархибдешуначила буриб. Илкьяйдали, регионнизиб ишдус чесабиуси хасси манзилличи хIядурбикIниличилара аргъахъиб.
ГIергъиси замана коронавирус тIинтIбирни ва халкьани-ургарти дазурби гIеркIни пикрилизи касили, архIяличи башес дигутани Дагъиста бухIнабси туризмаличи халаси пикри бяхIчииу или буриб Р.Ибрагьимовли.
«Москвализиб бетерхурси халкьани-ургабси «Интурмаркет 2020» выставкаличиб регионни цархIилти регионтачил гехIел вягIда дигьун. Россияла туризмала бекI З.Догузовас нушала республикаличила стенд дебали гIяхIбизурлири. Дагъистайчила багьахъниби пикрилизи касили, архIяби дурадеркIахъес ва гостиницабазир мерани дуцахъес нушала предпринимательтачи дахъал гIярзаби дашули сари», — викIи ил.
«Дагъиста бакьалаби» бикIуси маршрутличилара буриб Р.Ибрагьимовли. Республикали гIяхIлас 42 маршрут гьаладирхьули сари ва гьарилли сунес се-биалра сагаси, тамашаласи гьаргбиру.
Нушанира балуливан, гIяхIлас бегIлара дигути маршрутунили детарули сари: Дербент, «Сарыкум» гъумла кIиликI, Сулахъла къярд, Хунзахла чяхI-чяхIиби, Гъуниб… Амма Дагъиста жавгьар духурили бетарули саби Сулахъла къярд.
Дагъистан гIядатласи туризмалисцунра ахIи, бялихъчибасра, гIяяркьянабасра (мицIирагла суратуни кайсуси тупангличил) дебали тамашаласи мер саби.
Р.Ибрагьимовла гъай хIясибли, гIяхIладли башантала шайчибси ведомстволи ишдус сагаси бяхIчибиз гьалабяхI арбукьяхъес пикрибарили саби, сунесра «кемпинговый туризм» или ируси. Илгъуна жураличи тIабигIят дигахъути ва палаткабачил архIяли букьес дигути адамтала халаси иштяхI алкIули саби.
Ахирличиб бурес дигулра, республика гьалабяхI башни нуша дагъистанлантазибад саби дигахъуси, секьяйда гIяхIлас ил гьалабирхьулрал, илдази нуша сен-сен чедиахъулрал. Илизибад дигахъу нушачи туристуни бакIнира. Туристуни биалли, ишбархIилис, иша бакIибти чула юлдашунала хабуртачибли, урехиагарли Дагъистайзи башули саби ва дебали разили арбашули саби. Ил дигеси анцIбукь саби.
