f ok v in t y        Версия для слабовидящих

   Без возрастных ограничений

Илдала къайгъначибли

Гьалабван районна куль­­ту­ра­ла­ КIял­гIя­лизир «Ахъу­­ша­ла район» МО-ла ад­ми­­нистра­ция­ла заседание ва район­на учи­тельтала август баз­ла совещание дарх ду­ра­дер­кIиб.

07 сен 2018 0 комментарий   П.Маллаева

Цалабикибтала гьалав гъайухъун «Ахъушала район» МО-ла администрацияла бекI ГI.МяхIярамов.
Районна бекIли буриб гIер­гъиси замана улкала бухI­наб халаси пикри бяхI­чи­иули саби халкьла гIям­рулизирадти масъулти ирзниличи, илдала лу­гIи­лизир багьудила учреждениебачил дархдасунтира или.
П.МяхIярамовли ДР-ла БекI В.Ва­сильевла гIяхIси баркьудиличила—жа­ваб­ла хIян­чилизиб ба­жар­­дибикести адамти чеббикIес багьандан конкурс дура­буркI­ниличила гьанбушиб.
— Ил анцIбукьли иргъахъули саби, сецад мягI­ни­чебсил ишбархIи гIяхIси багьуди касни. Республикализиб илгъуна тяхIяр бузесаъни — багьуди кайс­нилис гIяхIси шартIли бетарар, — викIи районна бекI.
ГIур гъайрухъун багьудила от­делла начальник Б.Мя­хIям­ма­дова.
Илини буриб: «Районнизир дузули сари 46 цахIнабси багьудила, 7—школаличи хIя­дур­бирути ва 2– чеимцIаси багьудила учреждение, цар­хIил­ван буралли, дурхIнала спортшкола ва дурхIнала пагьмуртала Юрт. Лерилра илдани арбякьунси белчIудила дуслизиб чекабизурли къайгъибариб дурхIнази багьуди касахъес.
ГIяхIти багьудлумачил бел­чIудила дус таманбариб ХIин­тIала, Шукьтила, Бутрила, Кур­кила, ТIантIала, Гьебала, Гъуладтимахьила, Ахъушала цаибил номерла, Урхьучимахьила, ХIямшимала школабани, МухIела ва Усишала шимазирти багьудила учреждениебани».
— Пачалихъла цати им­ти­хIян дедлугнила аги дус­личи-дус гIяхIбулхъули саби. — ХIу­шазивад гьарилла къайгъна­ла гIяхI­дешличибли саби илкьяй­да бетаруси. Арбякьунси бел­чIу­­дила дуслизиб 36 педагогли цаибил категория касиб, 29 учительли—чебяхIси категория. ГIяхIси хIянчи бариб педагогуни — предметикунала Ассоциацияли. ИмцIатигъунти бучIантани имтихIян дед­лу­гу­хIели дахъал баллани касиб. Хаслира гIяхIти багьудлуми чедаахъиб Ахъушала цаибил номерла урга даражала школала бучIанти Р.ГIисаевани ва Р.ХIябибуллаевани, ХIямшимала — А.Адай­хIя­жиевани ва А.Кьи­цIалмяхIяммадовани, МухIела лицейла бучIанти Р.МяхIям­ма­довани ва М.МяхIяммадовани. Олимпиадабачир гIяхIти багьудлуми чедаахъиб МухIела гимназияла учительница Зугьра ГIябдуллаевани ва Шукьтила урга даражала школала учительница Мариям ГIялиевани бучIахъути дурхIнани.
— Багьуди кайсахънили­чи тIа­лабуни челис-че цIа­кь­­­ди­кIу­ли диъни нушаб леб­­та­салра гIячихъли саби, — рикIи ба­гьудила отделла на­чальник. — Рирхулра хIу­ша­­зи­вад гьарилли къайгъи им­­цIа­бирниличи тIа­ла­­буни хIясибли узес, гIяхIси ба­гьуди ка­сибти дурхIни гIям­ру­­личи хIя­дурбирес.
ГIур гъайбухъун Ахъушала цаибил номерла урга даражала школала директор М.МутIалимов, Ургубамахьила школала—ГI.ГIисаев, Цугнила школала—Р.Сулайбанов, ХIин­тIала школала—Т.Кьунниев.
Районна багьудила хIян­чи­зартала профсоюзла рай­комла председатель И.МяхIяммадов ви­кIи:
— Ишаб белчIудилизиб гьалабикибти дурхI­ни бучIахъути учительти разибирес­ гIягI­ниси саби. Ахирлизив гъайухъи, рай­онна бекIли буриб илар гьандушибти масъулти пикрилизи касили, школабас, учи­тельтас кумек бетаахъес тяхIурти далдуцили дирар или. БелчIудила дус гIяхIил таманбарибти директортас ва учительтас шабагъатуни дедиб.
Совещаниеличив гъайухъун ДР-ла Халкьла Собраниела депутат Р.ЯряхI­мадовла кумекчи М.Насруллаев. Илини бу­риб ишдуслизиб сагали школализи аркьути, яшав­лизир нукьсанти хъалибаргуназибадти ва цIуръа дурхIнас кумеклис дархьибти белчIудила гIягI­ни­ахълуми лер или, ва школабала директортази ил­ди де­диб.
Басират МяхIяммадовани лебтасалра баркалла багьахъур ва учительла БархIила шадлихъличир къаршидиркехIе или буриб.

 

Оставить комментарий

Последние комментарии

Новостные оповещения

Получайте новостные оповещения!

  • о чрезвычайных происшествиях
  • о политических новостях
  • о общественных новостях
Яндекс.Метрика Рейтинг@Mail.ru