f ok v in t y        Версия для слабовидящих

   Без возрастных ограничений

Журмакан Жамбулат даим уркIбазиб кавлан...

ГIямрулизивад шалгIерухъун пагьмучевси лукIан, ДР-ла культурала урибси хIянчизар, поэт, тилмаж Жамбулат МяхIяммадов.

05 окт 2017 0 комментарий
(0 голосов)
 
  • размер шрифта

МяхIяммадов Жамбулат МяхIяммадович акIубсири 1950 ибил дуслизив Дахадаевла районна Журмачила шилизив. Ил бехIбихьудла классуназив Журмачив учIули калун. ГIур белчIуди даимбариб Уркухъла кIинайс Трисанчила урга даражала школабазиб.

1973 ибил дуслизиб ДГПИ-ла филологияла факультет таманаили гIергъи ВатIа гьалабси чебла ахъиб. Жамбулат МяхIяммадович Зубанчила урга даражала, Журмачила гехIел дусла школабазив учительли узиб. Калун ил Избербашла ДагЗЭТО заводла инженерли узулира. ГIур узусири ил «Избербашла ялчи» газетала корреспондентли кIинайс отдела заведующийли. «Ленинна байрахъ» газетала корреспондентли чумал дус узулира калун. ГIяхIцад дусмазив районна «Шила гIямру» газетала редакторли узусири. Ил узути дусмазиб газетала аги багьесли гIяхIбухъун ва республикала районтала газетаби-ургаб цаибсили бетаур.

Бархьдеш дигуси ва сунела хIянчи ункъли балуси журналистла назмуртира халкьлис дигутили ва далуйтазир дучIутили детаур. Пагьмучевси поэт, журналист ва тилмаж барх бузутала умутчевси къякъбяхъли ветаурсири. Сагали бакIибти журналистунала гIибратчевси учительра сайри. Газетализиб илини цалра сяйси яра хатIабачилси макьала дурабухъахъес хIебалти. Ил илцадра сунечи сай ва хIянчизартала бузериличи чекайзурсири. Илала адамти-ургаб хIурмат халасири ва халадеш-хамдеш агарси суненира цархIилтала хIурмат-кьимат дирес дигахъи.

Назмурта лукIес ил школализив учIухIелил вехIихьибсири. Илала назмурти, очеркуни, поэмаби, районнацунра ахIи, республикала газебазир ва журналтазир дурадулхъутири.

Илини бахъал автортала (Ю.Кузнецовла, В.Волковла, Р.ХIямзатовла, А.Кардашла ва цархIилтала) произведениеби дарган мезличи шурдатур.

Республикала «Замана» газетала вахъхIила марси гьалмагъри, дигахъи илис сунела заманалантачил уркIи гьаргти яра масхарала лякьиртази ихъес.

Жамбулат МяхIяммадов Дагъистан Республикала урибси хIянчизарла уличи лайикьикибсири.

Ж.МяхIяммадов «Дяхъибти вавни» (1996 ибил дус), «Дардла далайчи» (2015), «ИргъхIергъулра замана» (2017) ва цархIилти жузала автор сай. Илала назмурти дурадухъун «Сагати урунжуни», «Савгъат» ва «Литературала урунжуни» бикIути дархти сборникуназирра.

Ж.МяхIяммадовлира илала гIямрула марси гьалмагъ Муслиматлира 3 урши ва 3 рурси абикьуртири. Илдазивадли ГIямар бикIуси урши хабарагарси балагьли ил къугъаси хъалибарглизивадли кевасибсири.

«Заманала» пагьмучевси лукIан Жамбулат МяхIяммадович нушала уркIбазив даимлис кавлан.

 

Последнее изменение Пятница, 06 октября 2017 08:36

Оставить комментарий

Последние комментарии

Новостные оповещения

Получайте новостные оповещения!

  • о чрезвычайных происшествиях
  • о политических новостях
  • о общественных новостях
Яндекс.Метрика Рейтинг@Mail.ru