f ok v in t y        Версия для слабовидящих

   Без возрастных ограничений

Писки Мяхl - Магомед Абдулаев

 Даргинский поэт и писатель 
09 окт 2017 0 комментарий
(0 голосов)
 
  • размер шрифта
 

***

Даршал къяна арцахъес
Ца къаркъалира вирар,
Азир кlарза буахъес
Ца гlяхlгъабзара виур.

***

Кайзес багьурси муруй
Хlеркайэс бала иру, 
Сен-сен кайзес хlяжатсил 
Хlези бархьдеш хlебуру.

***

Гlяхlси хьунуй вайгъабза
Гlяхlгъабзачи шуралта
Вайси хьунуй багьадур,
Багьа хlебуи хlелта

***

Анхъла адам ацlалра 
Анхъчи ахъли цlумикlи,
Сунела авкьяшанти
Анхъла духlнар цlерхьдикlи.

***

Ну ясируцес ахъри
Агара цайдешлизиб,
Сенкlун цайдешла душман,
Далай, леб уркlилизиб

***

Марти дигай нясхlейрар,
Мар Мургьи сигхlебирар.
Мардеш агарти, нясти
Мунапикьуни бирар.

***

Хъу дегlес хlедашанти,
Хъулри дигlяс дашанти,
Адамдешла лишанти
Адхlелкесли дишунти.

Кlирка кунби катурти,
Кlибяхlянти капурти, 
Лукъ сели лукъутирав
Хlуша, бикиб буканти?

***

"Шайтlайс дигул далайчи"


Дин хlейгул далайчиби
Нуни чехlебаири.
Далай хlейгул динчиби
Чумилра чебаира.

Пагьмула вегlли ахlи
Далай белчlес хlебала, 
Гlякьлула вегlли ахlи
Лехlахъесра хlебала.

Шаддираллира уркlби
Далайличил шантала,
Динчи викlар далайчис
Юлдаш сай шайтlунтала.

Шайтlунти, илбисуни
Саркъира лерил чузир,
Ялгъан динчиба чейу
Илди далайчибазир.

Сунес юлдаш варибси
Шаддеш бихул далайчи
Шайтlан духуси бургар,
Душман варибси къямбар.

Хlебалас цlуба сабил, 
Шайтlан цlудара сабил, 
Тамашала бургар ил
Акlубси саби-сабил.

Балулри, бекlбяхъ, хlуни
Шайтlа вайдеш, убяхlдеш.
Гlурра ункъли балули
Ургуд шайтlа неш-дудеш.

Шадси далай, ванал дев
Мезлукьуна мадакьаб,
Мунапикьра мезлукьра
Лебси мерлар мерс дакьаб.

Чlинкlирти бакlибхlели,
Дубуртази нушала,
Уркlдухъи, бишун, бикlар,
Шайтlунтас нурла шала.

Хlела шанти хlейгуси
Хlечибкlун, чlинкlир динчи, 
Верхlна-гехlна гьалав сай
Шайтlайс дигул далайчи.

***

Хъулкила цlахси пиша
Батес хlейрар хъулкини,
Сай кавлни хlебалалра
Халкьла кьакла хlейкили.

***

Кьясирулра хlушачи,
Гlяхlти дурхlнала бегlти,
Дарадаллира набчи
Сецад дахъал гlяйибти.

Кьадардиубну хlушаб
Талихlчерти ухънадеш,
Дила кьясдешла мерлаб
Минабиуб разидеш.

***

Исбагьила жагадеш
Бурес хlейрар жагьхlели,
Гlурра жагаси рирар
Ил далайрикlухlели.

***

Урхьницад дард-шишимти
Лерхlелира гlязизти,
Илди агарти гlямру
Диишира сегъунти?

***

Ц!аххlебилзуси нешлис
Ахlер дурхlя лайвакlес,
Вирару, гьатlи, сунес
Няс хlейкlули, неш викlес?

***

Цалис цали цlахти гъай
Дурули бехlбизалли,
Бирар исбагьибира
Цlахтиван кабилзули.

***

Давла имцlабиубли,
Адамдеш камдикlалли,
Багьа булъан адамла,
Сайра шакра хlейкили.

***

Дилагъунти сар дяхlра,
Дилагъунси саб яхlра,
Нуниван адамтачил
Дуртlулра гlяхlра вайра.

Ну гlяхlсирал вайсирал
Балхlебаласра нуни.
Баркалла дила гьуни
Даимбарнилис хlуни.

***

Адамти эс вирару 
Кьиркьиртас гьарли-марти?
Кьиматладарес балав
Кьиркьиртани пагьмурти?

Кьиркьирти, кьани кьяйда,
Кьясдешла кьикlли буга.
Кьиркьиртани убкlуси
Ужахъес шин хlелуга.

***

Яхlли гlямру дуркlути
Чум лебал хlебаласра,
Цаэсил, держлукь, хlела
Хьунул риъни баласра.

***

Держлукьлис арц дикалли,
Канилаб байрам бирар,
Кепекуни керхалли,
Хъа духlнар къавгъа дирар.

***

Букули бахъла намус, 
Кепирули каркадли, 
Бекl ахъбуцили вашес
Хlейруд, юлдаш, шавкадли.

***

Цулби дирахъис или, 
Вакlилра юлдашличи.
Хlебличиван хlерлира
Ну сагати цулбачи. 

Юлдашли наб сегъунти
Цулби дирул хlебалас,
Аммаки нешлихъунти
Дарес вирхlейрни балас.

***

Хlуни итцад умули
Хlербарибси хlела ши,
Се хlяйчи бетикилил
Гьачам чебаэс ваши.

Балагь-кьадарлизибад
Ваши шанти берцахъес,
Ца балга барес ваши
Ши даршули калахъес.

***

Назмурти лукlан ибгу
Бекlлар мехlе дамкьурта,
Се бикалра буругу
Лягlнатличи лайкьта.

Бекlлизиб лебси ахlи,
Бурес хlейрар чинилра.
Бекlлизиб лебси бури
Булеги Чараклира.

***

Держлукьли кани балха 
Держлис гlергъи хинкlали,
Гlур хъалибаргра "балха",
Багьиубли, хункlали.

***

Адамла гlязиз гlямру
Тамашала сар хlекьли,
Ил тамаша чебиу
Держлизибцун держлукьли.

***

Гlямрулизив гlяхlгъабза
Висули чехlеира,
Кепбиубли бисути
Чумилра чебаира

***

Гlямруличи гlяшикьли
Вирар гьарил духуси,
Держличицун гlяшикьли
Вирар гlямру дархибси.

***

Держли белкъи бирхlути
Гьар мерлаб къаршибиркур,
Кьацlли белкъи бирхlути
Бекlлил къаршихlебиркур.

***

Верхlличир имцlали сяхl
Бархала кахlедурцар,
Держлукьла канилизи
Урхьницад держ кадурцар.

***

Ну ясируцес ахъри
Агара цайдешлизиб,
Сенкlун цайдешла душман,
Далай, леб уркlилизиб

***

Анхъла адам ацlалра
Анхъчи ахъли цlумикlи,
Сунела авкьяшанти
Анхъла духlнар цlерхьдикlи.

***

Ванза рахlматли лукъан,
Мицlираг кьарли лукъан,
Урхьу шинни белкъалра,
Держлукь держли хlелукъан.

***

Гlяркьила кьутlкьудешлис
Гlякьлу бицибси инсай
Хlейрар умули дихlес
Уркlилар марти дигай.

***

Держлукьлис, бержибхlели,
Дуги бархlиван билзан,
Савли бекl узухlели,
Бархlи дугиван билзан.

***

Ламдикlули диалли
Варглизир гlяркьила цlа,
Баги хlебирар бужайс,
Бишалра анкъилаб цlа.

***

Шишимти черардукес
Бужулригу дигули,
Чебуркъубли саб улхlес
Чарх шишимта игули.

***

Держлукьла гьар биркlайзиб
Мер бирар кьуртlиутас.
Аммаки мехlелизиб
Мер хlебирар гlякьлулис.

***

Сецад вахъхlи каладра
Гlямрули велкъес хlейруд,
Держли велкъи гlямрура
Хlегьурли вебкlес вируд.

***

Держлукь разихlейрахъид,
Вахадлира унц белгьи,
Держ агарси мерличив
Вирар ил мухlли бигьи.

***

Дужутачи ахlенси
Селичилра хlерхули,
Хlерирар гьарил держлукь,
Кьяшма чарх хlебихули.

***

Гьарил бикибси кепек
Канила кабирхьули,
Гlямру дуркlу держлукьли
Бикибихlи калхьули.

***

Агь, хlябилра хlейгахъу
Адамтас кепли къагъси,
Гlур се балав держлукьли
Ил секlалра хlергъуси?

***

Гьимили саби набчи
Лебилра держлукьуни,
Кьарли берхъахъибхlели, 
Чучи вашуси хlуни.

***

Виаслира ишбархlи
Ил сягlят хlел билтlули,
Хlелтарая, хlяжурти,
Далуйтазир хlелтlули.

***

Сен хlуни халкьла гьалар
Пуждирутирав нуша?
Ужхlевжадив хlу-декlар?
Дикlулра набзи хlуша.

***

Цlубас цlудара викlес
Нура урузкlусира,
Держлукьуни пужбирес
Ну уруххlекlусира.

***

Кlибяхlянтала кьамлис
Душманри ну гьалавра,
Держлис хlяя дирцутас
Душман сайра гьаннара.

***

Гlякьлу бурес ухъадли,
Держлукь хlечи гlимуркlар,
Шинхъязи кайкахъалра,
Шишаличи гьимхlеркlар.

***

Держлукь, хlу балагь сайри
Хlечибад акlубтасра,
Цlудар изала сайри
Хlу лебилра шилисра.

***

Хlябал дус хlяжатдикиб,
Хlяким, хlед ахъли ацlес, 
Хlябал минутра даиб
Хlед ахъихlиван кацlес.

***

Адамтачи дигили
Шалахlерибси адам,
Шалах!ейру дугели,
Бац сунесцун ухалра.

***

Гьимукlибси унрани
Бецlкьяйда багьиубли,
Итил унрас чеббицlиб,
Гlяргlнас тупанг игьубли.

***

Сабухъ агар галгара,
Сяйли катур хlямчира,
Хамиубси хlякимра,
Хlеберцlибси хlянчира.

***

Мухlлила гъай багьалис
Исули ахlен? бикlар,
Аммаки гlяхlси девлис
Багьа баахъес хlейрар.

***

Масла вегlли бигlялра
Кебасибси саб, бикlар,
Мискинсини касалра
Бигlунси саби, бикlар.

***

Турла дяхъиличибра 
Итилла кьаркьайзибси,
Вегlла тlул цlакьли изур
Буреба къизбухъунси.

***

Цlакьла вегlлис чеблалис
Арц дедлуга гьарилли,
Амма цlакь агарсичил
Анцlбукь бирар ургlебли.

***

Хьунуйчи гlяйиб барни
Бакьахъадли хlезибад,
Увхlелхъан хlу гьамадли 
Урхlла гlяйибтазивад.

***

Мурул увяхlварили,
Сар ахъриэс дигуси,
Сунес гьанбикибсиван
Хьунул ахlен духуси.

***

Хьунул вяврикlухlели,
Мурулра чlярикlалли,
Сецад гlяйиб баралра:
Духути ахlен кlелра.

***

Мицlирхlелира пякьир,
Вебкlибх!елира пякьир,
Сахаватсили дуриб
Илди дугьби хlед, кьиркьир.

***

Мезлукь лехlкахъахъесра,
Мяштlа харжикlахъесра,
Хlелас виубси чилра,
Я вирхlейрар чилилра.

***

Мурхьли пикриикlуси
Пахlмучевси поэтлис,
Саб кlинали къиянси
Лукlесличиб хlелукlес.

***

Уркlи бархьси багьадур,
Улкlули вашаллира,
Гъайлизи балкlдеш гъудур
Хlебиру каршаллира.

***

Дусмадли дарданазив
Калаллира адамли,
Ца барх!и шадиалли,
Дард хъумурту гьамадли.

***

Пикрихlевхъи барибси
Абдал хатlа хьарбарес,
Гlягlнибиркур адамлис
Дахъал дусмазив узес.

***

Ца секундла сабурли
Сархибси талихl умцес,
Ахъри хlякьян чилалра
Умцlули умцан баргес.

***

Байрам саб наб гьар бархlи,
Шанти мукърачибхlели,
Цlябли дирар аргъ-бархlи 
Шанти ясличибхlели.

***

Кункти дигайла бегlтас
Кункти гlямру дигахъу,
Амма кункти гlямрули
Гlяламла хъу хlевхъахъу.

***

Пикрихlевхъи барибси
Абдал хатlа гьарбарес,
Гlягlнибиркур адамлис
Дахъал дусмазив узес.

***

Хьунул гlясириубли, 
Хlечи вяв-гьаврухъалли,
Заманалис бархьбати, 
Сунесцун бацlси хъалли. 

***

Мукьрас къуллукъбарадли,
Бала луга, диъ луга.
Гурдас къуллукъбарадли, 
Цацали гlяргlни дуга.

***

Адамдеш агарсилис 
Чилилра дедес хlейрар 
Амма лерсилизирад 
Илди керасес хlейрар. 

***

Сунес сай ваибсила 
Гьалмагъуни хlебирар 
Гьалмагъуни агарси 
Цайси галггъуна вирар.

***

Гьарил бикибси кепек
Канила кабирхьули,
Гlямру дуркlу держлукьли
Бикибихlи калхьули.

***

Даршал къяна арцахъес
Ца къаркъалира вирар,
Азир кlарза буахъес
Ца г!яхlгъабзара виур.

***

Ванза рахlматли лукъан,
Мицlираг кьарли лукъан,
Урхьу шинни белкъалра,
Держлукь держли хlелукъан.

***

Гьариллис саламличил, 
Барх чебмайсид къапlара.
Мабурцид кlелра някъли, 
Гьарил адамла някъра. 

***

Гlямруличи гlяшикьли
Вирар гьарил духуси,
Держличицун гlяшикьли
Вирар гlямру дархибси.

***

Держлукьлис арц дикалли,
Канилаб байрам бирар,
Кепекуни керхалли,
Хъа духlнар къавгъа дирар.

***

Хъулкила цlахси пиша
Батес хlейрар хъулкини,
Сай кавлни хlебалалра
Халкьла кьакла хlейкили.

***

Анхъла адам ацlалра 
Анхъчи ахъли цlумикlи,
Сунела авкьяшанти
Анхъла духlнар цlерхьдикlи.

***

«Сяг|идлис»

Къияйчи къакъбяхъили 
Къаплангъуна Сяг|идли, 
Къуймурван къугъабариб
Мях|ячкъала гьамадли. 

Тах шагьарла тахличи 
Талхъан - х|ек|ибзигъуна,
Умудешла т|ашкьяна,
Г|ях|гъабза гъалбец|гъуна. 

Х|ебаралли х|яракат
Бирх|ебирни баракат
Х|уни ункъли бабулри,
Дагъиста духуси нарт. 

Шагьаркад къунзухъасли 
Урк|и шадли пархбулхъан,
Х|у х|ергъули, буганти 
Бергесван гьимидулхъан. 

Къунбала х|енкь х|ебулхъиб
Бяхъибси ч|акализи,
Х|екьдеш аргъахъес х|ейрар 
Агъула ч|ич|лумази.

Дях| дарсдарили, шагьар 
Барибси сага, шала,
Бузерила байрахъчи 
Верхъаб Сяг|ид нушала.

Няслизиб ва яслизиб
Бахъх|и кавли тах шагьар,
Гьар шайчивад духуси
Х|ейалри Сяг|ид вагьар.

Сяг|ид-сартан сабурла,
Валгунси вакил халкьла,
Залум ч|ака дубурла,
Аллагь виъ х|ед икьала. 

Х|ела г|ях| баркьудлумас
Г|ялам баркалла бик|ар.
Сяг|ид, х|ечила хабар 
Наслубазиб х|ебубк|ар.

Илкьяйда вашен, Сяг|ид,
Сабурличил гьалавях|,
Х|емсар х|ед дезаик|ес
Халал узи Писки Мях|.

***

«Х|ейги х|угъуна дарган»

Ну х|ечи х|улук|или
Х|ериэс х|ейраслира,
Наб х|ечи гьимук|нили 
Г|ях|деш х|ехни баласра. 

Х|едцад масла алжана
Аллагьли гибх|егиб наб.
Марли кали, бих|улра 
Мискиндешла жагьаннаб. 

Х|у х|едцун х|ерирулри,
Урх|лис г|ях| х|ебирулри:
Леркъира верх|дех| хъулри, 
Г|урра дарес дигулри. 

Юртанира хъулрира
Дара сецад-дигара,
Гьалмагъ х|яжатвикалли, 
Вик|майк|уд арц агара.

Анар-ханар дарили
Урк|иларти аргъала
Ну х|ела агарали
Виахъубра агъула.

Чеблумала бек|ни лер
Вик|улри чичир-сарил. 
Чардарес г|яг|нити лер 
Дахъал арц чили-сарил. 

Наб х|ела чеблумала
Лебси ах|ен бяг|ибси,
Ахъри лебкъи г|ямултар,
Х|ебарри наб г|яг|ниси. 

Илкьяйда вашен, илбис, 
Къямбар къуртма, г|елавях|. 
Чевкъарну Писки чеэс,
Шурмалхъад х|у гьалавях|. 

Х|у сайри к|ук|ай к|арза,
Капур адам кайзурси.
Нура ах|енра гъабза,
Х|ечи дугьаизурси. 

Жанван масла вег| диган,
Ажалван мискин х|ейган,
Даргла узи виалра, 
Х|ейги х|угъуна дарган.

***

ШУКРУ АЛЛАГЬЛИЧИ

Миски, чlянкlули хьалли
Нушала урцlа улка
Даим давлачеблира
Ну, мургьила посылка
Ахъуша бархьаасли
Разили пишбирхъулра
Ахъуша абаасли
Уркlбухъи пашихъулра
Арилизи биркулра
Даим давлачебтала
Някъбази хlебиркулра
Бекlлил дагьри лебтала
Итира давлачебти
Давлачеббирахъулра
Мискинти, адабчебти
Мискинни кавлахъулра
Нуни дигай хlейхьибси
Агара давлачевси
Муэртазибцун сабра
Мискинта чебиуси
Дурала улкназира
Ну гьаман урцахъулра
Хасмушунала хунжи
Хайрума дирцlахъулра
Ну мурталра кавлулра
Жагьлира жагалира
Дила гьалмагълацун лер
Волгара Жигулира
Бархlилис ахъбикlулра
Ну багьаван мургьила
Лихlбачиб лямцlбикlулра
Туркла исбагьибала
Набчил гьалмагъдеш дарес
Гьуцlмалхъад, мискин, вари
Хlяким каримтазибцун
Сабину дила ари
Уктемдешра хамдешра
Датурли буэн мургьи
Хlечил дархдасунтину 
Биса, яс, гьуя-агьи!
Хlечи, я хlу лебтачи
Уркlи гlергъихlебулхъан
Хlурину цализи ца
Адамти кабуршахъан
Ну гlяшикьхlейахънилис
Гlянтlик!а мургьиличи
Шукру биаб сунечи
Чевях!си Аллагьличи!

***

Хlейалира илхlела
Адала я абала,
Гlяхlси юлдашли вирар
Хlед мер буцес узила.
Бикlар, узи агарли
Адам хlеркайэс вирар,
Марси юлдаш агарли,
Чилра хlериэс хlейрар.

***

Сецад биалра, давла
Ишатlиб хlебиути,
Дякьунхlели итатlир
Митрула мер биути.
Садакьара ламусра
Хъумартурти ишатlир
Хlушаб кьяркьси жагьаннаб
Кьадарбирар итатlиб.

 
Последнее изменение Понедельник, 09 октября 2017 08:33
Другие материалы в этой категории: « СНЕЖНЫЕ ЛЮДИ Двенадцать цудахарских песен »

Оставить комментарий

Последние комментарии

Новостные оповещения

Получайте новостные оповещения!

  • о чрезвычайных происшествиях
  • о политических новостях
  • о общественных новостях
Яндекс.Метрика Рейтинг@Mail.ru