Жабаева Наталья Кьурбановна акIубси сари хIурматла хъалибарглизир. Илала неш МяхIяммадова Мария Петровна дахъал дусмазир учительницали рузули калун ва дудеш МяхIяммадов Кьурбан МяхIяммадович пагьмучевси, халкьлис дебали манпагIятси, бахъал адамти дугьабилзуси тухтурли узули калун. Илдани Ахъушала шилизиб халаси хIурмат сархибсири.
1979 ибил дуслизиб Наташа Кьурбановнани Ахъушала урга даражала школа мургьила медальличил таманбариб. Илини, сунела неш классный руководительра сарри, санигIятлис марси, жавабкарси, черетаибси, дурхIнази гIяхIси багьуди касахъес къайгъилизирси рири или, бурули сари.
Школа таманбарибси дуслизир Наташа Дагъиста пачалихъла мединститутлизи карерхур. Мединститутра илини хIунтIена дипломличил таманбариб.
1988 ибил дуслизир ил Ахъушала районна больницализир педиатрли рузес рехIрихьиб, 1990 ибил дусличирад рехIрихьили 35 дус акушер-гинекологли, гIергъити 15 дус ил биштIати биркьуси отделениела заведующаяли рузули сари.
Наташа ва МяхIяммад Жабаевхъала пергерси хъалибарг сабри. Сепайда, тухтур МяхIяммад гIямрулизивад жявли арякьун кьалли.
МяхIяммад Жабаев Ахъушала районнизив дебали пагьмучевси, сунела санигIят ункъли бяркъурси тухтур кьяйдали машгьуриубсири. МяхIяммадли сунечи дугьаизурси адам чархIейри. Ил дуги-хIери хIеили, адамтала арадешлис къарауйчив вири, 2003-ибил дусла сентябрьличив гIямрулизивад арякьун (бунагь-хатIа урдуцаб сунела).
Наташани ва МяхIяммадли жагали чула хIябалра рурси абикьур, гIяхIси бяркъ бедиб, чебяхIси даражала багьуди касахъиб. Илдала хIябалра рурсили чула бегIталагъуна дякь чеббикIиб, мединститут белчIи, тухтурла санигIятличи бегIбиуб.
Наташа адамла уркIи иргъуси, халкьла хIурматбарес балуси, сунела хIянчи чебетаахъили, жавабкардешличил бируси, малхIямси тухтур сари.
Н.Жабаева «ДР-ла рурибси тухтур» ибси уличира лайкьрикиб, чебяхIси категорияра касиб. Ил «Ахъушала район» МО-ла администрацияла шайзирад чумал ХIурматла Грамоталичил шабагъатларарибси сари.
Илис гIямрулизир арадеш, бузерилизир сархибдешуни, хъулиб баракат дулгулра!

С.ГIябдуллаева