Ахъушала районна ЗАГС-ла отделла бекI специалист ХIямидова Муслимат МяхIяммадовначил хIянчила чебкад ихтилат бетаур.
Духуси, дяхI шаласи, малхIямси, халкьличил ралрикес балуси, 2005-ибил дусличирад рехIрихьили, ЗАГС-ла отделлизир жавабкардешличил, черетаили рузуси, Муслимат МяхIяммадовнани Ахъушала районна халкьла гьалаб хIурмат сархили сари.
– Ца бархIила бухIнаб чум адам ЗАГС-лизи дугьабилзулив ва сегъунти суалти дирару?
– Гьар бархIи нушачи 15-20 адам дугьабилзули бирар, гьатIира имцIали лебси заманара бирар. Гьалаб нушала ЗАГС-ла отдел Ахъушала районна администрациялизи кабурхусири, гьанна биалли ДР-ла Юстицияла Министерстволизи кабурхуси саби. Ил багьандан нушала хIянчилизир чумал дарсдеш детаурти сари.
Нушачи дугьабилзутала жура-журала къуллукъуни дирар: дурхIя акIнила кагъар, у бехIсурбарес, фамилия бехIсурбарахъес, дурхIялис дудешдеш кадизахъес, документуназирти хатIаби гьардарес, хъайчикабирути жагьилтас, декIарабиркутас документуни дицIахъес, гIямрулизибад арбякьунтала свидетельствоби дедлугни ва цархIилтира.
– 2024 ибил дуслизиб Ахъушала районнизиб чум дурхIя акIуба, чум жагьилти хъайчикабииба?
– Арбякьунси дуслизиб Ахъушала районнизиб 551 дурхIя акIуб, ЗАГС-лизиб белкI барахъили 55 жагьил хъайчикабииб, 191 декIарабикибтира биуб, 142 дурхIялис дудешдеш кадизахъур, 1 виштIаси вихIес сасиб, 30 адам у бехIсурбарибти лебри, 261 адам гIямрулизибад арбякьун, 490 адамли сагали свидетельствоби касиб. ДекIарабиркути адамти судла хIукму хIясиблира бирар.
– ЦархIилти организациябачил, учреждениебачил сегъуна бархбас леба?
– Нушани дахъал организациябачил бархбас бузахъуси саби: МФЦ-личил, ОМВД-личил, Пенсионный Фондличил, ЦСЗН-личил, судличил ва цархIилтачилра.
Гьанна гIергъиси замана судличил имцIали бархбас бузахъес хIяжатбиркули бирар, сенахIенну дахъал суалти дирули сари давла-масла черкадти. Илди суалти арзес багьандан гьаман судличи дугьадилзес гIягIнили саби.
– Дугьабилзути адамтала къуллукъуни заманаличир бекIдарес, дурала мераначирад дикIибти кагъуртас жавабти чардатес бажардидиркулраяв?
– Нушачи дугьабизурти адамтала къуллукъуни камси заманала духIнар бекIдарес гIягIнити сари. Дурала мераначирад дакIибти кагъуртасра жавабти чардалтулра, сецад жявли диахIеллира.
Гьанна ил хIянчи электронный тяхIярличиб бетурхуси саби, ил багьандан халаси гьамадеш леб. ил дурабуркIуси саби «Единый портал государственных услуг» – ЕПГУ, (Суперсервис) бикIуси программа хIясибли.
«Рождение ребенка» бикIуси Суперсервисла кумекличил виштIаси акIубхIели илала бегIтани дурхIялис гIягIнити документуни дарес бирули саби электронный тяхIярличил, ил хIерируси мер белкIахъес, СНИЛС, ИНН ва ОМС багьес багьандан сагали акIубси дурхIяла. Хъули кабиили, ярга баайчи тIашхIебизурлира, бегIтани дурхIя поликлиникализи велкIахъес, социальный кумекла шайчирти гIярзаби дедес ва гIурра дахъал цархIилтира секIал дарес бирули саби.
ДурхIя акIнила кагъар дигалли, касес бирули саби, дигалли электронный тяхIярличиб батес бирули саби.
Нушачи дугьабилзути адамти электронный тяхIяр хIясиблира дугьабилзес бирути саби.
– Чум хIянчизар леба ЗАГС-ла отделлизиб?
– Нушала кIел штат сари лерти, амма хIянчи лер дахъал, ну бекI специалист сарра, МяхIяммад ГулбяхIяндов специалист сай. Нушачи хъарси хIянчи жавабкардешличил, кьанхIебиахъубли, адамтала мурад бетурхахъули дузес къайгъибирехIе гьаннала гIергъира.
С.ГIябдуллаева
