Юсупов МяхIяммадзагьир ГIябдуллаевич акIубси сай 2004-ибил дуслизив Ахъушала районна ХIерхмахьила шилизив.
Шилизибси школалилир 9 класс делчIи гIергъи, ил шагьарлизи узес арякьунсири. МяхIячкъалализив чумал дус кали гIергъи, М.Юсупов 18 дус виубхIели, Ростовла областьлизибси Морозовск шагьарлизи арякьунсири ва илабси частьлизив хIянчиличи вехIихьибсири. Гьанна бусягIят МяхIяммадзагьир Юсупов Морозовскла юридический факультетла хасси учреждениела 2- ибил курсла студент сай. 2024 ибил дусла март базличив ил 150 адамличил варх хасси балбуц бетурхуси Украинала мер-мусаличи арякьунсири. Илди кумекчибиван бузутири — бяхъибти госпитальтази бикули, халабетаибти адамтас хIяжатси кумек гIеббиахъули, дугила замана цацадехIти объектунас къараулбирусири. Ца дуги къарайучибхIели, МяхIяммадзагьирла юлдашла кьяшлиуб серил баргбердиб. Юлдаш санчастьлизи аркуси МяхIяммадзагьирли урцуси дрон чебаиб. Илизивад верцес аваравиубхIели, МяхIяммадзагьир ва илала юлдаш бехIемцIлизи бикиб. Или биалра, юлдаш больницализи ваахъес ил бажардиикиб.
Къияндеш чедакIибси манзил сунела жайчицун пикрихIевхъунси ва юлдаш верцахъибси М.Юсупов Гъабзадешла орденничил шабагъатлавариб.
«Ца шилизи дякьунхIели нушаб вяхъибси гьести гIямрула адам цугикиб. Илала рурси раргес ва дудешличила багьахъес нуша бажардидикира. Мурул адамли илхIели нушаб мотоцикл пешкешбариб. Иличир нуша продуктуни садухес дашутири. ЦархIил шилизи дукибхIелира, илабра ванзала удиб барибси хъулиб вецIалцад адам цугбикиб. Илдира азадбатес нуша бажардидикира», —викIи М.Юсупов.
Дрон баргбердибхIели, халаси галга илала къакъличи кабикили, хъуцIарла лига бячи саби. Гьаланачи ил Владикавказ-Осетияла дявила госпитальлизив калун. БусягIятла замана М.Юсупов сагъвирули хъулив сай.
«Нушала улкала пахру ва хъарихъ саби Россияла гIярмия. ВатIа хъархIерагардеш багьандан мурталра дергълизи дурабухъес хIядурти гIяхIгъубзнани къуллукъбирули саби нушала гIярмиялизиб», —чеимцIабариб илини.
МяхIяммадзагьир Юсуповлис ва Россияла лебилра бургъантас чIумаси арадеш булгехIе. ХIушала уркIбазибси дявила гьав ахъли бихахъес Аллагь икьалавиаб.
П.Шахова
