ГIядатли бетаурливан, МЧС-ла кабизли халкьла телефонтачи пулан бурхIназир заб-марка дирар ибси багьахъни башахъуси саби. Гьанна биали, илгъуна багьахъни чебаибхIели, бахъалгъунти адамти шипIбиргIули саби ва заб хIедарахъес или Аллагьлизи булгули саби. ГIергъиси замана республикализир заб-маркали дарибти асуртачил адамти гьаннара бургъули саби. Интернетлизи хIердикIухIели, ибкьти аги-кьяйдализи бикибти адамти кумекбарахъес тиладиличил жибикIули чебиулра.
БурахIелли, дебали вайси аги саби Дахадаевла районна Уркарахъла шилизибра. Социальный сетаназир илди мер-мусаличир касибти дахъал видео-роликуни нуни чедиулра. Гьарли-марли дебали урехиласи аги саби илаб. Лебил ши ванзала уди аркьулив гьатIи или гьанбиркули саби. Ванза пIякьбиркули саби, адамтала хъулри, азбар-гIяя гъятIкадиили детихъули сари. Илдигъунти анцIбукьунази бикибти адамтас севан кумекбарес вирусив или гьанбиркули саби. Шагьарлизиб хIербирути адамталара аги къулайли ахIен. ЦацадехIти юртаназир духIнадикибти шин гьаннара архIедякьи кали сари. ГIурра заб даралли се бетарара гьатIи? ЧевяхIсилизи дулгесцун саби кавлуси. ГIурра нушани чебиулра республикала адамти севан цабиубли, кумек гIеббиахъули вяшбикIулил. Бурули бираргу, цацадехIти анцIбукьуни халкьла хIял багьес дурхьути сари или. Илгъуна цадеш ва уржибдеш дакIударибти адамтачи Кьудратла ВегIлира уркIецIи баресгу.

ПатIимат Шахова