Игьубси ургиван дуцIли аркьули сари бурхIни, ил­кьяй­да­ли хъярхъли шалгIер­дул­хъу­ли сари дусми. ХIера, «За­ма­на» газетализи ну рузес ра­кIибхIейчирад 7 дус ди­киб. Ца дусла манзилван ка­дил­зули сари наб илди вер­хIел­ра дус. БегI гьалар ре­дак­ция­лизи ну 2017 ибил дус­ли­зир студентка рирухIели, прак­­ти­каличи ракIибсири. Ит­хIе­ли гьаланачир газетала бу­зе­­­риличил тянишриубси наб ил хIянчи дебали тама­ша­ла­си­ли бизур. ЦагьатIи наб гIяхI­би­зурси ишаб – ба­хъал ха­ла­бетаибти адамти буз­­­ни. Гьай­гьайрагу, пик­ри­ду­­хъа­­хIел­ли, халаси адам лев­си хъа­ли­барг­ли­зирра аги-кьяй­­да де­кIарти дираргу. Та­лихI, бал­гун­деш, гIякьлу-дагь­ри­­­лашалси дав­ла, уржиб­де­ш илар ахъси да­ра­жали­чир ди­рар.

Илдигъунти аги-хIял сарри ре­­дакциялизирра. Илаб бузути гьести гIямрула адамтани ну­шаб дар­гала миллатличила, тарих­ли­чила, культуралашалси рухI­ла дав­лаличила ва наслубала барх­бас­­лис бекIлидиубти далилтачила тамашалати баянти гьаргдариб…
Дус бикили гIергъи, ну ре­­дакциялизи чаррухъунра. ХIян­чила кариэс или иша ра­кIиб­сири. ИтхIели бекI ре­дак­торла заместительли (кIи­найс редакторлира) рузусири ГIя­лиева Салимат БяхIям­ма­дов­на.

Дарган мезла белкIла, гIил­мула ва культурала дунъяли­зи илини ну някъ буцили рухI­накаира. Салимат ГIя­лие­вани набчил мекелли халаси хIянчи бариб. Багьуд­луми ахтардидарес наб ца баз итхIели гиб­сири. Ил манзиллизир нуни делкIунти лерилра макьалаби Салиматли делчIи, лу­гIян­да­рили, газетализи кадирхъули рири. БелкIла шайчир кадизахъурти низам-кьяйдара илини сарри наб гIердурибти. Гьанна 7 дус ну иличил тянишлира, амма ца бархIилра вайси хIяйчир ил чераибси ахIен. ГIянручI хIян­чила ляркьухIели, абухъунси бер­хIиван пишряхъили, ил ре­дакциялизи арицIур. Салимат Аллагьли ванзаличи рархьиб­си хIурулгIянван рилзан. ХIянчилар сегъунти-дигара адамтачил ва анцIбукьуначил нуша къаршидиркули дирехIе. Салимат гьачамалра рачарархили, нуни чехIериис. Гьарилличи илала малхIямли дугьаризни че­биухIели, мяштIка­ри­ру­ли рирус.

«Замана» газетала лебилра хIянчизарти – уржибти, ца­лис ца кумекбарес гьалакти саби. ХIянчилаб илгъуна аги ру­ко­водительлизибад дига­хъуси саби. ИтхIели газетала бекI редактор вири Юсупов Арсен ГъазимяхIяммадович. Гьанна ил багьахънибала ва печатьла Агентствола руководитель сай. Арсен Гъа­зи­мя­­­хIяммадовичгъунти ру­ко­­­во­дительти дебали камли бур­гар или гьанбиркули саби. Су­­­нела хIянчизартачи ур­кIи изуси, мурталра кумек гIе­б­­би­ахъуси, лерил тяхIяр-кьяй­даличи чекайзурси вири ил. БекI редактор сайливан, гьа­рил шайчиб нушаб илини гIибрат чебиахъи. Мисаллис бурасли, гIянручI гехIла байхъала дикили, ракIибхIели, ил мурталра хIянчилав нуни чейули рираси. Арсен Гъа­зи­мяхIяммадовичла сипта хIя­сибли сабри акIахъубси «Да­гъистан» Этномедиахолдингра. Жур­налистунас хIянчи гьа­мад­дарес, бегIлара челукьуси алапабала шайчибси суал арзес ва илди ахъдуцахъес Арсен Юсуповли дебали халаси хIянчи итхIели барибсири. Гьарли-марли замана ва арадеш мяхIкамхIедарили, дуги-хIери цадарили сунела коллективлис кумекбарес узусири ил. БусягIятра Агентствола руководитель сайлира илгъуна хIялалси бузери илини даимбирули сай. БарсбикIуси алавчарси дунъяличил барх, газетала бу­зерира гьалабяхI башули са­би. Студентуни ва жагьилти хIя­чи­зарти редакциялизиб бузули леб. Сагаси бекI редактор ИсмягIилов  ГIяб­­дуряхIман МяхIяммадрасуловичли ва жагьилти хIянчизартани га­­зе­тала бузерилизи деба­ли та­­машалати, гьаннала тIа­ла­бу­начи далдикибти тя­хIяр-кьяй­да духI­на­кайули са­ри. Газета гьа­­чам­ли­чиб-гьачам «жагь­би­кIу­­ли» саби.

Гьайгьайрагу, лебтанилра хIергъули биэс асубирар газе­тала кьадриличила ва ишаб ду­рабуркIуси хIянчиличила. Дар­­гала лерилра районтазир ка­­диркути анцIбукьуначила, гIил­­мулизир, спортлизир, культу­ра­лизир ва цархIилти кьялубазир детурхути мягIничерти далдуцуначила нушани ишар лукIулра. Даргантала рухIла давлала умхьули бетарули саби нушала газета. Ил багьандан, газета бучIеная ва къулбасбиреная.

«Замана» газетала хIян­чи­­­зар­тас — дила ахIерси кол­лек­тив­лис лерилра гIяхI­ти­гъунти дул­­гулра: бузери гьамад­би­кIаб, сархибдешуни имцIа­дикIаб, арали датабая!

 

ПатIимат Шахова