ВатIайчи ва вегI акIубти мер-мусаличи дигичебти адамти саби нушала дагъистанланти. Мурт иличи урехи чебихьалра, илди хIядурли бирар ил ва иличиб хIербирути халкь батахъес, мяхIкамбарес дурабухъес. Ил багьандан саби тарихла декIар-декIарти дусмазибра нушала дагъистанланти мутIигIбарес хIебирути. СенахIенну ВатIайчи диги илдани мурталра цаибси мерличир чедиути сари.
Илдигъунтазивад ца сай МяхIяммадов Зубайру Ибрагьимовичра. АкIубси сай ил 1977 ибил дусла июльла 19-личив Сергокъалала районна Сергокъалала шилизив (илала дудеш ГIяймаумахьилизивадси сай, неш — УбяхI МахIаргила шилизирадси).
1994 ибил дуслизив ил гIярмиялизиб къуллукъбарахъес живарибсири. Илавад Грузияла ва Абхазияла ургар къалмакъар-къавгъа детаурхIели (1995-1997-ибти дусмазив), илдазир бутIакьяндеш дарахъес вархьибсири. Ил гьужумлизив З.МяхIяммадов вяхъра вяхъибсири.
2023 ибил дуслизив ил, сай гIяхIъулали вягIда бигьи, Украинализиб бетурхуси дявила хасси балбуцлизир бутIакьяндеш дарес, ВатIан батахъес арякьун. Илавра ил чуйнара вяхъиб. Сен-биалра илини сунела дявила къуллукъуни тамандирули сари. БусягIятла заманара дявила хасси балбуц бетурхуси мер-мусаличив гьаларти къяяназив сай. Къияндешунас мутIигIхIебикIути, ВатIайчи кахIедурхути диги уркIилизи даимлис минадиубти Зубайру Ибрагьимовичгъунти гъубзни лебхIели сарра нуша ишбархIира паргъатли дузес ва хIердиэс дирутира.
«Неш, хIуша чили далтахъутира, нуша Дагъиста уршбани хIедатахъахIелли?» — викIули вирар ил мурталра. Илцадра вегI акIубти мер-муса ва гъамти адамти ахIерабарес къайгъилизивси улкалис марси багьадурличи пахрухIебаресра сеналра хIейрар. Сунела нешла цайли цаси урши виалра, ил ВатIайс къияндикибхIели, шайчив калес сеналра хIейуб. Ил яшавбарес или Москвализи арякьунсири, илавад биалли – СВО бетурхуси мер-мусаличи. Илини гъамтази чизилра хIебурили, сай гIяхIъулали бутIакьяндеш дарес бетурхуси мер-мусаличи арякьунси сай. Дус дикили, отпускличи хъули вакIес хIяжатлихIели сабри илини нешлизи ва гъамтази багьахъурси сунени дявила къуллукъуни тамандирниличила.
Зубайру хъалибаргла пергер бекIра сай. Илала хIябал дурхIя леб: кIел рурси ва ца урши. Хъалибарг Избербаш шагьарлизиб хIербирули саби.
Гъамтани буруливан, Зубайру МяхIяммадов дебали уркIецIичевси, малхIямси, цархIилтас гIяхIдешуни дирес хIемсуси дубурлан сай. «ХIяжатбикалли, илини сунела михъирлабад уркIира дурасили, цархIиллис бедлуга», — илкьяйда буриб илала нешла рузи ПатIиматли. Илцадра мякьлабтачила уркIи изуси, гьарил адам гIевуцес хIядурси сай Зубайру. ИлгъунахIели сай ил, сеналра гIелавяхI шурхIевхъи, душмантази ВатIан батахъесра итмаданал дураухъунси.
Дигахъаси Зубайру Ибрагьимович ва иличил бархти нушала асилти бургъанти жяв-жявли чула ахIерти нешаначи, хъалибаргуначи ва узи-уршиличи ара-сагъли чарбухъи. Илдигъунти гIяхIгъубзни лебхIели Чедибдеш чараагарли нушала бирниличи халаси умутра леб!
Салимат ГIялиева
