ГIядатли бетаурси, миллатла кIа­нала байрам ГI.Ба­ти­райла уличилси Даргала театр­ли ишдуслизиб кIинайс дура­бур­кIули саби. Ил балбуц хIя­дурбарибси саби ДР-ла халкьла багьудила отличник, театрла музыкала бутIа къелгIеббикуси Эльмира Иб­рагьимова. ГIяхIбаркьла бал­буц мил­латла культурала бяхI­чибизлизиб бе­терхахъес иб­си илала сипта театрла ди­рек­торли ва хIянчизартани ункъли гIеб­­буциб, ва сагадан хIер­би­кIутас ра­зи­дешла, тамашала хIялани пеш­кеш­да­риб.
Театрла жаняхIлизиб Избербашла адамти ва гIяхIли, ил лугIилизиб – Башкортостан Республикала татартала пачалихъла драмала Туймазинский театрла гIяртистуни, цалабикиб. Байрамла хIурматла гIяхIлас, хьунул адамтала палтарла белхъхIебелхъуси бутIа сабливан, миллатла кIанала жагадеш чебаахъиб, гIяхIялдешла гIядатуни гьаладихьиб, далай-делхъла пагьмурти гьаргдариб. Театрлизиб бузути пергер исбагьибани жагати макьамтаур миллатла палтарра (дефиле) чедаахъиб.
Балбуцлизир жигарла бутIакьяндеш дариб Туймазинский театрла гIяртист, РБ-ла урибси гIяртист Фандиль Мухаметдиновли. Илини татартала мезличиб далай зайбухъахъун, сабира халкьани цабирахънила ва миллатуни-ургарти гьалмагъдешла бархбасуни уржахънила лишанни бетаурси.
ГьанбиркахъехIе, Туймазинский театрли Избербаш шагьарлизи «Халати гастрольти» бикIуси проект хIясибли архIя дураберкIибси саби. Проектли чебиахъуливан, регионна театрти цаличи ца гIяхIладли дашар. Ишдусла гIебшни Даргала театрла гIяртистунира чула спектакльтачил Башкортостан Республикала Туймазы шагьарлизи архIя дурабуркIу.

Маргарита Арсланбекова