Хъалибарг наслубачирад-наслубачи диути дурхъадешунала хазна ва гьарилла гIямрула хIебелхъуси бутIа саби. Ил кумекла, дигила, ванадешла, талихIла ва паргъатдешла хъарихъ саби.
ДурхIядешла гIямрулизир бегIтани нушази чула багьудлуми, устадеш гIерисахъули сари, вайличила ва гIяхIличила балахъули саби, дурхъати гIядатунала хIурматбирахъес, жавабкардеш дихахъес, дигичертили дирахъес бурсидирулра. БегIтала пасихIти насихIятуни, илдала къайгъни нушала гIямрулизиб гьуни гIеббуруси зубарили детарули сари.
Белгиси замана бикибхIели, нушанира хъали-цIа алкIахъулра ва бегIти детарулра, нушала дурхIнас бяркъ бедлугули ва гьар секIайчи бурсибирули. Илкьяйдали даимбирули саби наслубачилси бархбас. Гьарил хъалибарг сунела гIядатуначилси ва хасиятуначилси биштIаси дунъя саби. ХIера, илди гIядатунани сарра нуша лерилра цаладирхъутира.
Хъалибарг нушала гIямрула бурхIни мягIнили ва талихIли дирцIахъуси дурхъадеш биъни багьандан, улкала Президент В.Путинни 2024 ибил дус хъалибаргла Дус биъниличила багьахъурсири. Ил дус ахирличи бикайчи нушала республикализир ва арагIебли улкализир хъалибаргуни гIердурцниличи дяхIчиаибти далдуцуни дурадеркIиб.
Сагаси Дусла байрам сабаэс гьаларти бурхIназиб Гьалмагъдешла Юртлизиб хъалибаргла Дус ахирличи биркнила балбуц бетерхур, сунезирра бахъал дурхIначилти хъалибаргунани, СВО-ла бутIакьянчибала хъалибаргунани, 40 дусличибра имцIали барх хIербирути хъалибаргунани бутIакьяндеш дарибси. Балбуцличир илкьяйдали республикала ведомствобала вакилтанира бутIакьяндеш дариб.
Цалабикибтачи саламла дугьбачил дугьаизурли, хъалибаргла дурхъадешличила бурили гIергъи, ДР-ла Халкьла Собраниела Председатель Заур Аскендеровли, хъалибаргла институт дебабирахънилизи ва дурхIнас бархьси бяркъ бедлугнилизи белгиси пай кабирхьни багьандан, бахъал дурхIначилти 10 хъалибарглис ДР-ла БекIла Баркаллала кагъурти дедиб.
Республикала декIар-декIарти мер-мусаличирад дакIибти хъалибаргуни-ургаб Ахъушала районнизибадси МяхIяммадовхъала хъалибаргра лебри. Илдала хъалибарглизиб шел рурси халабиули саби. Неш Хадижатли рурсби бяркъличи биркахъули, хъалибаргла анкъи ванали бихIули, дурхIни ва мурул къайгъначил алавбуцили, хIеррирули сари. Рурсбала дудеш, хъалибаргла бекI Ильяс МяхIяммадов дзюдола ва самбола шайчивси спортла мастер сай. ХIулбала шала нукьсанбикнила сабабли, Ильяс цаибил кьукьяла чулахъ ветаур. Амма, уркIиагархIейубли, спортлизиб сунела мер баргиб. Илини чулахъуни-ургар детурхути абзаначир бутIакьяндеш диру. ДуцIрум Москвала областьла Раменское бикIуси шагьарлизиб бетерхурси дзюдола шайчибси абзличиб Ильясли 2-ибил мер буцни хъалибарглис мягIничебси анцIбукьли бетаур.
Ильясли ва Хадижатли чула рурсби дубурлантала дурхъати гIядатуни хьулчилизи дуцили, абилкьули саби. МяхIяммадовхъала хъалибарг МяхIячкъала шагьарлизиб саби хIербируси. Илдала халатигъунти хIябалра рурси шагьарла 20-ибил школализиб бучIули саби. БиштIатигъунти рурсби школала гIямруличи абаили ахIен.
Чесабиуси Сагаси Дусла байрамличил МяхIяммадовхъала хъалибарг мубаракбарес дигулра. Сагаси дуслизир илдала пикруми-кьасани гIямрулизир детерхаб, талихIчерти бурхIни дахъдикIаб!
ПатIимат Мирзаева
