ГIябдуллаев МяхIяммадрасул ЯхIъяевич акIубси сай Дубримахьилизив. МяхIяммадрасул, тах шагьарлизибси Дагъиста пачалихъла педуниверситет заочно учIули таманбарили гIергъи, Дубримахьилизибси урга даражала школализив физкультурала учительли узес вехIихьиб.
2007-ибил дуслизив Къизлар шагьарлизи гечвиуб ва ДГПК-лизив преподавательли узес, 2009-ибил дусличивад Къизлар шагьарлизибси дурхIнала ва гIулухъабала спортла школализив тренерли узес вехIихьиб. 2018 ибил дусличивад ил Къизлар шагьарлизив дурхIни Олимпиадаличи хIядурбирути резервла спортла школализив узули, сунела тренер-преподавательла хIянчи даимбирули сай.
МяхIяммадрасулла спортличи диги виштIахIейчирад акIубтири. Гьанна ил Россияла МС-ла халкьани-ургабси даражала мушулбашнила шайчирти абзанала судья сай. Багьудила Отличникла ура касили сай, ДР-ла физическая культурала ва спортла Министерствола шайзивад ХIурматла Грамоталичил ва дахъал цархIилтира шабагъатуначи лайикьвикили сай.
МяхIяммадрасул ГIябдуллаевли руркъути дурхIнани Россиялизирцунра ахIенну, дурала улканазир детурхути абзаназирра бутIакьяндеш дирули, гьаларти мераначи лайикьбиркули саби.
МяхIяммадрасулли руркъути дурхIни ГIяли МяхIячевли ва ХIяжи Кьадиловли гIулухъаби–ургар детурхути Россияла ва Европала кьадрила абзаназир гьаларти мерани дуцили саби. Рашид ГIябдурашидовли Россиялизир гIулухъаби–ургар детурхути абзаназиб гьалабси мер касиб. МустапахIяжи Малачидибиров 2021 ибил дусличивад гIулухъаби–ургарти, гIур жагьилти– ургар детурхути Россияла, Европала, лебил дунъяла кьадрила ва Ш.Умахановла, Р.Дмитриевла, И.Ярыгинна, Ю.Н.Семеновла умачилти халкьани-ургарти абзаначир, Къарачаево-Черкессиялизир, Азербайжайзир, Нефтеюгансклизир, Испаниялизир, Албаниялизир детерхурти абзаначив гьаларти мераначи лайикьвикили сай.
МяхIяммадрасул ГIябдуллаевли руркъути дурхIни жавабкардеш дихутили, цIакьтили халабиули саби. МяхIяммадрасулли сунела гIямрула рархкьячил барх шел урши-рурси абилкьули сай.
Сунела гIямрулизир ва бузерилизир сархибдешуни имцIадикIаб, сунени руркъути дурхIнани гIурра абзаначир гьаларти мерани кайсули разивираб!
С.ГIябдуллаева
