Гьалабван нушала газетала марси гьалмагъ ГIябдусаламова Мисей Рабадановнала сагаси жуз дурабухъун. Мисей ГIябдусаламовани назмурти риштIали лералли лукIес рехIрихьибсири. Илала назмурти районна «Колхозла байрахъ» ва республикала «Ленинна байрахъ» (гьанна «Замана»)газетабазир дурадулхъутири. Ил акIубси сари Хайдакьла районна Чумлила шилизир. Шилизибси школализир 8 класс тамандарили гIергъи Мисейли Мажалисла районти-ургабси хьунул адамтала школа-интернатлизиб белчIуди даимбариб. ГIур чебяхIси даражала багьуди касес кьасличил ДГУ-ла математический факультетлизи карерхур. Ил чедибдешличил хъараахъурли, Мисейли мугIяллимла бузери Хайдакьла районна шимазиб бехIбихьиб. БусягIятла замана Мисей Рабадановна тах шагьарла 59 ибил школализир математикала мугIяллимли рузули сари. Ил барх бузутала, школала бучIантала, илдала бегIтала хIурматличил пайдаларикIули сари.
Мисей Рабадановна дурхIнас дигахъуси мугIяллимцунра ахIенну, шел рурсила нешра, хала нешра, анкъилаб цIа ухахъуси хьунулра, пергер адамра сари. Илини математикала мугIяллимла санигIят чеббикIили хьалли, даргала литература давлачеббиахъес халаси пай кабирхьули сари. Чедибра буриливан, илала сагаси «Савлила балга» бикIуси жуз цаибси ахIен. Илала сари-регIти кIел гьатIи жуз гьаларра дурахъунтири: «ХIяланала чури», «УркIила гьундури». Сагали дурабухъунси жузлизир авторли сунела дахъал шаликарси, урхIмешуахIенси пагьму гьаргбирули сари. «Сагаси балгализир» лер: сунела нешлис, рурсбас, гIямрула къакъбяхълис, гъамтас,бархкьябас, марти дигайлис, ВатIайс, Украинализиб бургъути гIяхIгъубзнас хасдарибти назмурти, багъишлаби.
Даргантани Мисей Рабадановнала сагаси жуз дигиличил кьабулбирниличи рирхулра, сунес биалли гIурра жузи дурайахъес къаркъагъуна арадешра, уркIила ахъси гьавра, бузерилизир сархибдешунира дулгулра.
Раисат МуртузагIялиева
