МяхIяммадова ЖумягI Ражабовна акIубси сари Бутрила шилизир, хIурматла хъалибарглизир.

Ил школа гIяхIти кьиматуначил таманбарили гIергъи Буйнакъск шагьарлизибси хьунул адамтала педагогическое училищелизи карерхурсири. Училище хъараахъурли, Бутрила шила школализир бехIбихьудла классунала учительницали рузули сунела бузерила гьуни бехIбихьиб. Школализиб илини 55 дусличи гъамли хIянчи барили сари.

ЖумягI Ражабовна черетаибси, пагьмучерси, жавабкардешличил сунечи хъарси хIянчи бируси, сунела шила халкьла, коллективла ва школала бучIантала халаси хIурмат сархибси учительница сари. Сунени бучIахъути дурхIнас ил дебали дигахъу. ДурхIнази гIяхIси багьуди касахъес, белчIудиличи гъира акIахъес, гIяхIси бяркъ бедес къайгъилизир рузули сари ЖумягI Ражабовна.
Школала ва шила гIямрулизир илини жигарла бутIакьяндеш дирули сари. ДурхIнас жура-журала шадлихъуни, декIар-декIарти темабачил «гьаргти дурсри» дурадуркIу.

ЖумягI Ражабовнани сунела гIямрула вархкья ХIясайчил барх авал урши-рурси абикьур, гIяхIси бяркъра бедили, лебтазилра чебяхIси даражала багьудира касахъили, гIямрула гьунчи дураиб. Илдала ца урши Ибрагьим Ибрагьимов гьанна Бутрила шилизибси М.Р.СягIидовла уличилси шолала директорли узули сай. Сунела неш кьяйдали жавабкарси, сунечи хъарси хIянчи чебетаахъили бирули, сунела бузерила гьуни даимбирули сай. Гьаннала гIергъира уркIичерли рузахъес арали ратаби, хIурматла ЖумягI Ражабовна, сархибдешуни имцIадикIаб!

Сабият ГIябдуллаева