Афганистайзиб бургъули калунти микIхIентачила гъай детаурхIели, Ставропольла крайла Туркменский районна райвоенкоматла хIурматла уркьуйчи бегIлара гьалаб баршибси сурат орденна вегI игит сайливан, Адзиев Хизри ГIябдулхIялимовичла саби или набзи буриб. Ил чи саял, ахтардибарира.
Наб иличила кам-гьамати баянти даргес имканбакIиб. ГIяхIгъубзначила хъумхIертахъес ибси кьасличил илди нушала газета бучIантасра гьаладихьес пикрибарира.
Хизри Адзиев акIубси сай 1966 ибил дуслизив МикIхIила шилизив. ГIярмиялизи укьес замана баибхIели, бегIтачил варх Ставропольла крайлизи гечиуб ва илавад гIярмиялизи арукиб. ХIябал базла хIядурдешра барахъили, ил Афганистайзи вархьиб, дявилати анцIбукьуназир бутIакьяндеш дирули, ил илав кIел дус калун.
Документунази белкIи кьяйдали, илис «Интернациональный чебла ихъухIели, Афганистан Республикализир чедаахъибти гъабзадеш багьандан, гIергъити дявила шабагъатунира дедили сари: «ХIунтIена зубари» орден, «Дявила сархибдешуни багьандан», «Ургъан-интернационалистлис баркаллаличил Афганиста халкьла шайзибад» ва «СССР-ла Ярагъладарибти ЦIакьани 70 дус диънилис» медальти, СССР-ла Верховный Советла шайзибад Грамота.
Наб имканбакIиб илала командирличил ихтилатбаресра, илини набзи дурибти баянти хIушабра гьаладирхьис: «1986 ибил дусла ноябрьличивал, Иолотань шагьарлизиб (Туркменистан) полигонничиб хIядурдеш барили гIергъи, Хизри Адзиев пахрули вицIилри, сунела дявилати къуллукъуни Афганиста мер-мусаличир даимдирниличи. Хизригъунтачи ит заманала уршби кьяскабирутири, дебали «гьарбизурсилизи» халбирули.
Сунела чарх-бекI хIясибли, Хизри кьуватчевсири, амма цазаманализир илизир малхIямдешра чедиулри. Ил, къияндикибси замана, адамлис кумекличи музаухъес мурталра хIядурсири, гIяхIдешуни дирес умсуси ахIенри, бархьдеш дигахъи. Сай акIубси МикIхIила шира илис ахIерсири, иличила даим хабурти дури, бегIтала, шантала ва школализибти мугIяллимтала халаси хIурматра бири.
ХIябал баз дикили гIергъи, Хизри Адзиевли Пули-Хумри бикIуси шагьарлизиб мерлабиубси 395 ибил мотострелковый полкла 6-ибил ротализир сунела къуллукъуни даимдариб. Ил ротали Афганиста северный бутIализир детурхути дявила анцIбукьуназир бутIакьяндеш дирутири. Илгъуна подразделениелизир къуллукъуни тамандирес мурталра халаси хIурмат-кьиматлизи халбирусири, гарнизонтазив кайили уэс хIейруси Хизрира хIязлис ахIенри илав дакIувиубси. Илала бузахъуси санигIятличи гъирара иштяхIра чехIедаэс хIейри, ил къиянти аги-кьяйда лерси ва урехиласи гьужумла дайлав вирусири. Цаибси гьужумлизирал Хизрини сай гъабзадешчевси ургъан виъни чебаахъиб. Илала къайгъи итмаданал командиртанира хIисаббариб, байхъала дус дикили гIергъи, илис сержантла звание бедиб. Гьаланачи Х.Адзиев отделениела командир вариб, кIинайс – 3-ибил взводла командирла заместитель. Илала гIергъи, взводла командир мурталра масхурта угьусири, сай взводла директор виъниличила, Хизри биалли, гьарли-марси командир виъниличила.Ил масхарализибра бархьдеш лебри. Дубуртази дурадуркIути архIябазиб къияндикибхIели, Хизрини солдатуначи хIеруди бирнила дурабад, илала бекIдешлиур къуллукъуни тамандируси замана илдазивад цалра вяхъибси ахIенри.
Мурталра ил хъарбаркь таманбарес бегI гьалав дураулхъусири, къияндешличи яра вамсниличи хIерхIеили. Сунела мисалличил илини цархIилтазира чебиахъи чилилра усалдеш дакIударес хIейрни. Лебтасалра къияннири, амма илди нуша Совет хIукуматла манзилла бургъантири, сабира ЧебяхIси ВатIа дергълизиб Чедибдеш сархибти нушала хала дудешунала гIядатуни даимдирути.
Гьачам Гиндукуша бикIути дубуртачивад ил солдатунала кьукьяличил шин гIяхъес кайцIулри, илдас биалли, душманти укабиилри. Хапли чебакIибси балагьличи хIерхIеили, Хизрила бекIдешлиубси кьукьялис гьужумлис къаршидеш даресцунра ахIи, душмантала ца ясируцесра имканбакIиб.
ЦархIил замана рота вертолетуначиб Саланга къярдлизи кабатуртири, ил душма тыл сабри. Амма дявила балбуц, тIабигIятла вайти шуртIри диъни багьандан, гIяхIцадхIи бухъянбитIун. Сухпаекуни тамандиублири, роталис дубурла гьундурачибад башес чевкъулри. Гушдешли гIяжизбарибти солдатуни дебали багьлали башулри, илдигъунти аги-кьяйда биалли, душмайс дигестили урдулхъан. ИлхIели командованиели кьукья хъябагьрила хъарличи букьяхъес хIукмубариб, илар гьаларван нушала частанани датурти, гIеладухъунти консерваби лертири. Ил хъарбаркь урехиласири, укабиибти душмантачи бяхIигниличил. Аги-кьяйда гьатIира къияндулхъахъулри продуктуни минабала авлахъличир диънилира.
Кьукьялизи каберхес дигутала къяйлизи бегI гьалав дураухъун Хизри Адзиев. Илини хъарбаркь гьарбизличил бетерхахъур, минабала авлахъ ахъили, консерваби даргили, подразделениелизи даахъиб. Заманаличиб кьацIлабиубти бургъанти цIябдиайчи ахъанайтачи абаэс ва оборона буцес бажардибикиб. ГIергъила бархIи биалли, илди бронеколоналичи кабацIиб.
Илдигъунти гьунарти сарри хьулчили детаурти Хизри Адзиевлис шабагъатуни дедлугухIели. Амма илала баркьудлуми халаси хIурматличира лайикьли сари.
Х.Адзиевли 395 ибил полкла 6-ибил ротализиб къуллукъбируси замана, 1985-1986-ибти дусмазиб, сержантли цалра хъарбаркь убхIебатур (зягIипдешличира хIерхIеили, ит замана лебилра гьаман бухъутIа изайчил (гепатит) ва дуцIарила изайчил (малярия) зягIипбиркулри), дявила анцIбукьуназир (50-цад гьужумлизир) жигарла бутIакьяндеш дири ва халати гъабзадешличил сунела дявила чебла ихъи».
ВебкIибсири ил гIяхIгъабза июньна 27-личив 2019 ибил дуслизив. ХIяб леб сай акIубси МикIхIила шила хIябразиб. Амма сецад дусми ардукьялра, нушани Хизригъунти гIяхIгъубзни хъумхIертехIе. ЧеалкIуси наслулизира илдачила багьахъес дирусигъуна къайгъира дакIубирехIе.
ГIябдулхIялимла Хизрис
Дагъистан дила ВатIан
Къаркъагъунти гъубзнала,
Душмайс бяхъ чейгахъути
МикIхIен багьадуртала.
Афганиста дергълизив
Душмайчил вяхIибсири,
Царугагар дергълизив
ГIелумхIейзур гъабзари.
Чедидирхъи лесани
ХIярхIубала заблиуб,
Бяхъибти юлдашуни
Дурайсули къакъличиб.
Афганиста дергълизив
Верцахъири Аллагьли,
Душма няс кьялшубази
ХIейкахъири итхIели.
Вайнукьабас сеналра
Хизри, мутIигIхIекIири,
Дергълизив дуги-хIери
Виради кьалли сахъли.
Чарухъунри хIу хъули
Ахъили чебла хIела,
Дявила дяхъи-хъасли
КъантIдариб гIямру хIела.
Аргъайзиб гIебалгьули,
ТIамала ит дявила,
ЯхIбарес хIебиубли,
ХIянбердиб уркIи хIела.
Хадижат ГIямарова, Ставропольла край
