Р.ХIямзатовла уличилси Мил­лат­ла библиотекализиб Зубайдат ХIясановала ва Фатима Гаджа­л­овала «Хайдакьла някьиш — Хайдакьла гьаб-убла тарихла лишан» би­кIуси жузличил тянишбирнила балбуц бетерхур.
З.ХIясановала назмуртачилси далайличил «Хайдакьла рурсби» бикIуси къумуз бирхъянтала ансамбльли балбуц бехIбихьиб.
Балбуц къелгIеббикуси, библиотекала культурала программабала отделла заведующая Ольга ГIялиевани жузличила буриб. Республикала БекIла Грантла сурсатуначил ва Хайдакьла районна администрацияла икьалаличил жуз дураибси саби. Ил жуз «Арт мастерская «Руки матери» бикIуси проектла бутIали бетаур.
Жузла авторти биалли, гьарли-марти устни саби. Зубайдат ХIясанова — РФ-ла халкьла рурибси уста, Россияла культурала Министерствола «Россияла рухI» бикIуси премияла лауреат сари. Фатима Гаджалова биалли, тарихла гIилмуртала кандидат, ДФИЦ РАН-ла археологияла, этнографияла ва тарихла Институтла гIилмуртала халасигъуна хIянчизар сари.
Миллатла библиотекала директор ГIяли ГIялиевли жуз дурабухъни, сагати жан акIниличил цугбуциб: «Хайдакьла някьишличила жуз автортасцун ахIенну, лебилра Дагъиста культураличи пикри бяхIчииутас мягIничебси анцIбукьли бетарули саби. Илдигъунти жузани багьудлуми имцIадикIахъути сари, мякьязибадал секIал бяркъяхъес иштяхI алкIахъуси саби».
Зубайдат ХIясановани бурни хIясибли, ишбархIила манзиллизир лерти «Кайтаги» этноцентрла лерилра проектуни районна администрацияли гIердурцули сари. Хайдакьла някьишличи бурсибирнила шайчирти кружокуни лерилрара-сера шимазир, культурала учреждениебазир ва районна школабазир дурадуркIули сари.
Культурала сиптабала Президентский фондла проектла дазурбазиб урус мезличи шурбатурси Англияла этнограф Роберт Ченсинерла «Хайдакь. Дагъистайзирадти чIянкIила искусство» бикIуси ва гьанна дурабухъунси З.ХIясановала ва Ф.Гаджаловала жузи хайдакьла някьишличи пикри бяхIчииутас гIилму руркънила шайчир бекIлидиубти пособиеби сари илира гьанбушиб З.Нагьбаровли.
БурахIелли, Р.Ченсинерли 30 дусличибра гьалабси манзиллизир, гIядатуни дузахъанти мицIирли лебай, дучибти баянти ил жузлизи кадерхахъурти сари. Илини дяркъурти 171 някьишла журабазирад 123 Хайдакьла районничил дархдасунти сари, 46 – Южная Даргинияличил.
Хайдакь гьаб-убла санигIят акIубси центр биънилис чедир гьандушибти баянти бикьрили детарули сари.
Жузличил бучIанти тянишбирнила балбуцлизир илкьяйдали бутIакьяндеш дариб ДР-ла культурала министр Марита Мугадовани, тарихла гIилмуртала доктор МяхIяммадхан МяхIяммадхановли, Россияла урибси художник КьурбангIяли МяхIяммадовли, философияла гIилмуртала кандидат ХIямзат ГъазимяхIяммадовли, РФ-ла халкьла художник Шамил Абакаровли, гIилмула ва культурала цархIилти хIянчизартани.