Бузерила, социальный бяхIчибизлашал политикала ва ветерантала къуллукъунала шайчибси Пачалихъла Думала Комитетли «СВО-ла бутIакьянчиби гIеббурцни, чеалкIуси наслулис патриот бяркъ бедлугнила бузерилизи халаси пай кабирхьни багьандан» ДР-ла Халкьла Собраниела депутат Шамил ГIямаров Баркаллала кагъарличил шабагъатлавариб.

Регионна парламентлизибси «Справедливая Россия – За правду» бикIуси партияла кьукьяла заседаниеличиб шабагъат бедиб ил кьукьялис бекIдеш дируси Камил Давдиевли.

Иличи че, республикала жамигIятла гIямрулизир жигарла бутIакьяндеш дирнилис ва гьести гIямрула адамтала челукьути масъултачи пикри бяхIчииъни багьандан, МяхIячкъалала шагьарла дявила ва бузерила ветерантала, Ярагъладарибти ЦIакьанала ва низам-кьяйда далтахъути органтала Советла шайчибадра Ш.ГIямаровлис ХIурматла Грамота бедиб.

Гьарли-марли Шамил ХIясбуллаевичли дурабуркIуси бузери халаси баркаллаличи лайикьли саби. ИшбархIи улкалис къиянси замана илини нушала бургъанти гIеббуцес имканти ва сурсатуни дургули сай. ХIукуматлира илди къайгъначи пикри бяхIчииаили, лайикьси шабагъат бедни дигеси анцIбукь саби.

Шабагъатуначил Ш.ГIямаров нушанира мубараквирехIе. Сугаси Дуслизирра халкьлис къулукъличи каибси бузерилизир халати сарбидешуни дирахъули, гьалавяхI вашулицун дигулра!